Претходен број

Велигден ќе ги донесе коалициите

И СДСМ и ВМРО-ДПМНЕ не откриваат детали, а преговорите со партнерите се обвиткани со конспиративност

Оливера Војновска

Во предвечерјето на Велигден, веројатно, ќе се расчисти мистеријата околу позиционирањето на партиите за претстојните вонредни парламентарни избори и ќе биде многу појасно, кои и какви коалиции ќе си ги одмеруваат силите на 1 јуни.

Премиерот и лидер на ВМРО-ДПМНЕ, Никола Груевски, најави дека до Велигден ќе ја обелодени, како што ја нарече самиот, неговата „партиотска и европска“ коалиција. Социјалдемократите деновиве ќе го стокмат европскиот сојуз, но официјалното објавување најверојатно ќе биде по велигденските празници. Во меѓувреме, и двете партии не откриваат детали, а преговорите со потенцијалните партнери се обвиткани со голема доза конспиративност.

Во коалицијата предводена од СДСМ, освен ЛДП предвидено е да влезат НСДП, ЛП, Новата алтернатива на Ѓорѓи Оровчанец, ДПТ и ОПР. Новите социјалдемократи на Тито Петковски и либералите на Стојан Андов за синоќа најавија дека нивните партиски тела ќе ги донесат конечните одлуките за настап на изборите. Во ЛДП тактизираат и не соопштуваат какви се шансите за договор.

Листите на кандидати за пратеници партиите треба да ги скројат и да ги предадат во ДИК најдоцна до 2 мај. Вчера излезе последната анкета на ИРИ, според која рејтингот на ВМРО-ДПМНЕ од декември досега пораснал за 3 проценти и изнесува 29 отсто, а кај СДСМ е во мирување - 11 проценти.

Шефот на Центарот за комуникации на ВМРО-ДПМНЕ, Илија Димовски, е уверен дека ВМРО-ДПМНЕ ќе ја направи вистинската коалиција што ќе им донесе уште еден мандат.

„Коалицијата ВМРО-ДПМНЕ ќе биде многу силна, ќе вклучи многу партии, експерти, организации. Овој сојуз ќе понуди брз економски развој на Македонија и ќе овозможи нејзино интегрирање во евроатланските асоцијации“, ни рече Димовски.

Во блокот што ќе го предводи ВМРО-ДПМНЕ извесно е дека ќе бидат социјалистите на Љубисав Иванов - Ѕинго, Демократскиот сојуз на Павле Трајанов, ДОМ на Лилјана Поповска, Сојузот на Ромите, Партијата на Власите. Премиерот Груевски вчера се сретна со делегација на земјоделците предводена од Вељо Тантаров, завчера со лидерот на СОНК-Конфедерација на слободни синдикати, Дојчин Цветановски, а во понеделникот со Сојузот на стопански комори на Венко Глигоров. Така, се очекува овие асоцијации на изборите да и' искажат поддршка на десничарската ВМРО-ДПМНЕ.

Потпретседателот на СДСМ, Игор Ивановски, вели дека се' уште не се знае кој се' ќе биде во европската коалицијата која ќе се спротивстави на политиката на Груевски.

„ Разговорите не се завршени. СДСМ нема да дозволи, внатре во партијата и во комуникацијата со другите партнери, примарен да биде интересот на поединци. На овие избори апсолутно не е битно кој ќе добие политички мандат како поединец“, вели Ивановски.

Петковски за медиумите изјави дека НСДП е многу блиску до договор за влегување во големата коалиција што ја подготвува опозицискиот СДСМ. Според него, веројатноста да биде создаден таков сојуз е 60 проценти.

Лидерот на ЛП, Андов, завчера бил во седиштето на СДСМ, но не сакаше да открие до каде се разговорите, и кусо ни рече дека „најнапред мора да разговараат во партијата“ и дека денеска „ќе се знаат работите“.

На последните парламентарни избори Андов беше во „портокаловата коалиција“ на ВМРО-ДПМНЕ, а заедно со Петковски беа дел од парламентарното мнозинство.

Дел од помалите играчи, во обид да обезбедат влез во парламентот, преговараат за заеднички настап и формирање трет политички блок, но процените се дека тој на изборите не би имал некаква конкретна политичка тежина. Тука се спомнуваат Партијата на слободни демократи на Љупчо Јордановски, (кој преговара и со СДСМ), ВМРО-Народна- луѓето кои останаа со Ѓорѓи Трендафилов, независниот пратеник Есад Рахиќ и социјалистот Зоран Витанов.