Караџоски потрошил 18.000 евра за ручеци и за виски

Антикорупциска бара од Владата да го разреши директорот на „Македонски шуми“ поради недомаќинлак

Катица Чангова


Антикорупциска комисија побара од Владата да го разреши директорот на „Македонски шуми“, Жарко Караџоски, поради недомаќинско работење. Јавното претпријатие со кое раководи Караџоски во 2010, наречена година на економска криза, исплатило 11.500 евра само за ручеци и за вечери во кафеани. Фрапантно е тоа што првиот човек на „Македонски шуми“ потрошил 6.500 евра за репрезентација, најголем дел за скапи алкохолни пијалаци - виски.

Но, тоа не е се'. Директорот Жарко Караџоски и неговиот возач, Љупчо Здравевски, месечно примале надомест за одвоен живот од 200 евра месечно, иако на релација Скопје - Прилеп патувале со службеното возило на претпријатието. Ова значи дека секој од нив лани ставил в џеб по 2.400 евра.

Првиот антикорупционер, Илми Селами, вчера на прес-конференција потенцира дека ваквото однесување на носител на јавна функција е спротивно со Етичкиот кодекс. Тој е зачуден од разузданото располагање и трошење на јавните пари доколку се има предвид дека со години раководството на „Македонски шуми“ се жали дека работи или со загуби или со минимум добивка, со тенденција кон нула.

„Само во текот на еден ден биле направени седум фактури и биле потрошени над 1.000 евра. Во добар дел станува збор за фиктивни фактури за фиктивни угостителски услуги преку кои директорот испумпал пари од буџетот на претпријатието, со цел прибавување финансиска корист за себе или за друг“, информираше Селами. Државната комисија работи и на кривичноправниот аспект на фактите од овој случај, со цел да примени и други алатки од сопствената надлежност.

Претседателот на Антикорупциска оцени дека е крајно време и Јавното обвинителство и судството да се отрезнат и сериозно да ја сфатат својата работи затоа што само со ефикасно и ефективно постапување по иницијативи на Комисијата ќе се спречи корупцијата и кај граѓаните ќе се влее доверба во правниот систем.

Комисионерите поднесоа уште две иницијативи до градоначалниците на Битола и на Тетово за разрешување на директорите на битолското средно медицинско училиште „Д-р Јован Калаузи“, Јасмина Миќиќ-Десановска, и на тетовското основно училиште „Гоце Делчев”, Цветко Видоески. Десановска, со цел да го задржи директорското место, ја вработила ќерката како советничка за образование и наука во Битола, а Видоески направил повреда на правото на работен однос.