Сомнителни попови кај г.г. Стефан

Што барале грчки и бугарски распопи кај архиепископот, кои се претставиле лажно

Билјана Јовановска


Атмосферата во Синодот на Македонската православна црква се вжештува до точка на вриење, а на владиците им претстои тешка и мачна седница. Тие што поскоро ќе мора да ја расчистат дилемата - зошто струмичкиот митрополит Наум му препорачал на поглаварот Стефан да прими распопи од Грчката и од Бугарската црква, кои лажно се претставиле дека се од Црквата од Крит.

Минатата недела во кабинетот на македонскиот архиепископ биле примени „анхијалскиот епископ на Бугарската православна црква Харалампи“ и божемниот, грчки архимандрит Тимотеј Капсанис, со едно цивилно лице. Вториот му направил и интервју на г. г. Стефан, за што му кажал дека по авторизирањето, ќе биде објавено на „порталот на Грчката православна црква“. Објаснувањето е многу тенко и ако се има предвид фактот дека Грчката црква е нашиот главен негатор и кочничар за признавање на автокефалниот статус, тоа дури звучи и детски. Дотолку повеќе што поглаварот исклучително тешко дава интервјуа и тоа секогаш го прави откако однапред ќе му се достават прашањата.

Откако средбата беше обелоденета и уште побрзо симната од сајтот на Скопската епархија, се јавија првите реакции. Неофицијалниот сајт на Бугарската православна црква - www.dveri.bg, реагираше експресно и појасни кои биле гостите што ги прими и ги нагости г.г. Стефан.

Според овој сајт, архимандритот Харалампи бил размонашен од Синодот на БПЦ, а летово скандалозно бил „ракоположен“ за епископ на една од старостилните цркви во Грција, т.н. „Вистинска православна црква“ од расколничкиот митрополит Ангел Атанасиу. Харалампи тогаш бил замонашен со уште една уште поскандалозна личност - извесен Дим Дуков, кој не ги крие своите хомосексуални склоности.

Како вакви типови со сомнително потекло, кои лажно се претставуваат, можат да стасаат во кабинетот на нашиот архиепископ? Г.г. Стефан вчера преку соопштение го впери прстот директно во струмичкиот митрополит Наум. Како што стои во соопштението, „посочените лица, кои беа препорачани за прием кај неговото блаженство од страна на митрополитот Струмички г. Наум, се претставија дека доаѓаат од Бугарија и од Грција, односно од црквата на Крит. Тие не му беа познати на неговото блаженство, но поради препораката и поради нивното барање и претставување, беа удостоени со христијанско гостопримство. Архимандритот Тимотеј посочи дека неговата посета на Македонија, која е со благослов на Неговата Сесветост, Вселенскиот патријарх г. Вартоломеј, се должи првенствено на желбата изворно да ја запознае нашата земја и Македонската православна црква и патем да се поклонат пред нашите светињи“.

Иако станува збор за настан што фрла темна дамка на целата МПЦ, соопштението беше објавено само на сајтот на Скопската епархија. Дали одговорот треба да се бара во фактот дека главен уредник на официјалниот сајт на МПЦ е токму струмичкиот митрополит Наум? Ако е така, овој скандал отвора нови прегрупирања во врвот на нашата Црква.

Индикативен е и тајмингот на посетата на бугарските и на грчките распопи - се случи непосредно пред Соборот на СПЦ, кој почнува утре, а на кој сигурно ќе стане збор и за евентуалното продолжување на дијалогот меѓу црковен Белград и Македонската православна црква. Пред неколку години г. Наум беше заговорник на идејата МПЦ да се здружи со другите непризнати цркви од Југоисточна Европа (Украинската, Црногорската...) во некаква асамблеја и така заеднички да настапуваат. Оваа иницијатива, за среќа, не наиде на масовна поддршка кај епископатот на МПЦ, но на ова веднаш реагираше Српската православна црква, која ги информира сите помесни цркви.

Но, ако тогаш работите се забошотија, како сега г. Наум ќе го објасни „тројанецот“ со бугарските и со грчките распопи, кои ни ги разнишаа односите со Бугарската православна црква? Далеку од тоа дека архиепископот наивно треба да ги прима сите совети на собраќата.

Сигурно дека мора да одлучува, пред се', самиот и за своите потези да сноси консеквенции, ама овој пат, очигледно, дарата ја пречекорила мерата и првпат во историјата на МПЦ еден поглавар директно г�� посочува својот собрат за виновен. Врти ли МПЦ нов лист во комуникациите меѓу великодостоинствениците - ќе се покаже многу скоро, веќе на наредната седница на Синодот. (Б.Ј.)