Северина во Скопје

Во Македонија се дебелеам

„Им се радувам на доаѓањата и на луѓето во земјава, ги сакам македонските традиционални јадења. Овде се чувствувам олабавено, како да доаѓам кај блиски, кај роднини, немам никаков притисок, а тогаш сум своја, тогаш е се' порелаксирано. Единствен проблем е тоа што секогаш ме водат во убави ресторани, а јас не можам да одолеам на тавче-гравче, селско месо, ајвар... Овде најмногу се дебелеам“, вели големата хрватска поп-ѕвезда Северина Вучковиќ, која деновиве е во Скопје. Директен повод за нејзиното гостување во Македонија е претстојниот концерт, дел од турнејата „Здраво, Маријо“, што ќе се одржи на 6 ноември во спортската сала „Борис Трајковски“, во организација на ТА „Гуливер милс“, на кој како специјален гостин ќе се појави Горан Бреговиќ.

Домашните медиуми, како и секогаш кога е во прашање Северина, ја окупираа хрватската пејачка со блицеви, камери, диктафони. Сексапилната Севе се појави во конгресната сала на „Борис Трајковски“ во секси фустан со длабоко деколте. Таа умее да кокетира со публиката и со камерите, трпеливо да позира, а потоа и да одговара на новинарски прашања.

По цели осум години, најави голем целовечерен концерт во Скопје, кој по Загреб, Белград, Љубљана и Нови Сад, ќе значи и завршница на турнејата „Здраво, Маријо“. Настанот е замислен како театарска претстава во која Северина ќе пее, глуми и танцува, во придружба на 25 танчари, проширен бенд, тамбураши, ќе менува различни костими, фустани...

Почетокот на концертот е закажан во 21 часот, а според информациите на организаторот, сите места ќе бидат за седење, додека цената на влезниците дополнително ќе биде објавена. (Б.Ш.)