Насловна

Филип Петровски на чело на Демократска десница

Демократската десница на своето основачко собрание за претседател на партијата го избра Филип Петровски, а беше усвоен и партискиот статут. Во своето обраќање пред присутните претседателот на новоформираната партија истакна дека новиот политички субјект ќе ги решава проблемите на граѓаните наместо како што е практика од големите партии да се плука врз секакво решение. Петровски сепак се пожали, дека при формирањето на партијата биле изложени на притисоци, а голем дел од оние кои сакале да се зачленат страхувале да не ги изгубат работните места.

„Голем дел од граѓаните ни велеа со вас сме, но се плашиме да не се дознае за да не ги изгубиме работните места во админситрацијата, да не им бидат пратени инспекции на оние во приватниот сектор. Но ние велиме дека е време да се престане со притисоците и ние немаме намера да се повлечеме од оваа борба. Време е граѓаните да го заземат почесното место и да се чувствуваат слободни“, истакна Петровски, кој со критички осврт говореше за вкупните актуелни состојби во државава.

Според него Македонија може да тргне напред само со нов политички субјект кој ќе се залага за доследна примена на човековите права, владеењето на правото, подобрување на економијата, социјалата, екологијата и друго. Партискиот грб на Демократска десница е составен од два триаголника кои ги претставуваат буквите ДД и се свртени една кон друга, а нивното возвишување претставува прогрес. Во долниот дел има пресечен дијамант кој ги обиколува двете букви со што се означува цврстината. (Св.У.)