Што прават денеска

Елена Ристевска

пејачка

Денеска е ден за откритија. Конечно, претпладнево, заедно со „Тојота“ ќе одржиме прес-конференција на која ќе откриеме што се крие зад папарацо-приказната за т.н. моја нова афера во автомобил. Всушност, станува збор за герила-кампањата за автомобилот „тојота аурис“, чие заштитно лице од денеска ќе бидам и официјално.

Петар Горко

актер

Малку порелаксиран ден што се однесува до актерските обврски. Навистина вечерва играм во „Браќа Карамазови“ на репертоарот на Битолскиот народен театар, но денот ми е релативно слободен. Имам едно интервју за радио, веројатно некое кафе-дружење на Широк сокак, семејни обврски... Така уште десетина дена, до 27 март, кога започнувам со снимањето на новиот филм, во режија на Теона Митевска.

Влатко Плевнеш

музичар

Денот во овие претпролетни денови неизбежно започнува со утрински кафе на терасата. Денеска имам во план да го завршам аранжманот за уште една песна за новиот, шести албум на „Силви бенд“, кој планираме да излезе до крајот на годинава. Покрај тоа, со Силви работиме и на програмата за Виенскиот бал, каде што ќе настапуваме в сабота.