Македонски Состојби

ВМРО-ДПМНЕ рине лански снег!

Манчо Митевски

Лошите резултати, сиромаштијата, масовните протести и падот на рејтингот ќе ја натераат власта да сфати дека ќе мора да оди на избори

Македонија во последниве две-три години, без разлика на годишното време, живее во поларна зима - како смрзната, завеана и отцепена земја. Кога веќе станува збор за зима, се поставува прашањето што прави еден одговорен граѓанин, домаќин, директор, функционер кога ќе наврне снег? Дали зема лопата и го рине натрупаниот снег или размислува за ланскиот? Е, нашите денешни „слуги на народот“, премиерот и неговите, наместо да го чистат овогодишниот снег, кој како лавина речиси ја покри државата, па ништо не се гледа и тешко се дише, се занимаваат со ланскиот снег! Веќе петта година од уста не ја вадат поранешната власт на СДСМ, која, бидејќи не го чистеше својот снег, народот, како строгите градски комунални инспектори на изборите во 2006 и 2008 ригорозно ја казни. Палката на власта и' ја даде на партијата ВМРО-ДПМНЕ, која вети дека има знаење и капацитет за чистење снег и деблокирање патишта! Но, гледаме дека тие и натаму се преокупирани со ланскиот снег, а парламентарниот спикер Трајко Вељаноски наместо да ги задолжи своите од партијата да си го исчистат снегот во својот двор пред и во Собранието, бидејќи и за нив ќе следува казна, го тера пратеникот Бучковски да го направи тоа!

ВМРО-ДПМНЕ во отсуство на резултати од четири и полгодишното владеење - и во поглед на стратегиските интереси на државата и во поглед на секојдневните проблеми на граѓаните, се разбира, резултати има само кај политичко-идеолошките интереси на партијата (вмроизација на општеството) - се занимава само со критики на СДСМ, на Бранко Црвенковски, на опозицијата, на невладините, на олигарсите, на инакумислечките, третирајќи ги како последни остатоци на транзицијата. Тука е и незаобиколната Грција (поддржана од „непринципиелните“ САД и ЕУ), како виновник за сите неволји и застои на Македонија. А се знае дека власта ја добија за да ги спроведуваат своите ветувања, да ги решаваат проблемите, да ги подобруваат условите за живот на граѓаните и да ја внесат државата во НАТО и во ЕУ.

Ќе посочам неколку илустрации на изместената диоптрија на владејачката структура кон актуелните проблеми, занимавање со сите, но не и со себе и со својот придонес за денешните проблеми со кои се среќава Македонија. Појдовна позиција во овој релативизирачки пристап на премиерот Никола Груевски и на ВМРО-ДПМНЕ е тезата дека тие се заслужни за успесите, а за неуспесите се виновни сите други, само не владејачката партија и нејзиниот неприкосновен лидер. Еве два цитата за типично вмровско-груевистичко поставување на тезите и резонирање.

Првиот, „Не сакам да помислам низ што ќе поминеше Македонија ако во оваа светска криза наместо ВМРО-ДПМНЕ, СДСМ ја имаше власта на чело со Бранко Црвенковски, со Шема, со Јани, со Бузлевски и групата олигарси околу нив“, рече Никола Груевски на митингот по повод 20-годишнината на партијата. Но, не кажа какви застои и падови, изолација, беспарица, сиромаштија, губење работа и назадувања им се случија на македонската држава, на македонските фирми и на македонските семејства и граѓани, а не се знае и до кога ќе им се случуваат, поради дилетантскиот начин на справувањето со кризата и воопшто водењето на државата од Владата на ВМРО-ДПМНЕ.

Вториот, од истиот митинг, „Ако светската криза е едниот крупен проблем со кој се соочуваме, блокадата за членство во НАТО и во ЕУ од страна на Грција, со цел условување да се смени нашето уставно име и идентитет е вториот крупен проблем. Да потсетам, оваа Влада каде што доминира ВМРО-ДПМНЕ, ги исполни сите критериуми за членство во НАТО, кои СДСМ претходно не ги исполни“, поентираше Груевски, но не кажа каква стратегија, какви црвени линии и каков политички консензус направи неговата Влада за да ги зајакне македонските преговарачки позиции и да и' парира на непринципиелноста на Грција. Не кажа и зошто Македонија на меѓународен план остана без пријатели и се најде изолирана и застана на опашката на сите регионални процеси. Не случајно од највисоко место на власта беше пласирана лага дека (во време на СДСМ) Македонија во 1995 година одбила прием во ЕУ (што беше демантирано од ЕУ и од СДСМ), за да се добие алиби за опструкциите и неспособноста на сегашната влада да го реши проблемот со името, а Македонија да тргне напред.

Ќе акцентирам една секвенца како пример до каде оди свртувањето на вниманието од сегашните проблеми и занимавање со случаи извадени од нафталин. Во расправата за иницијативата за распуштање на парламентот и за предвремени избори, реплицирајќи на дискусијата на пратеничка на опозицијата, која наброја неколку актуелни проблеми на граѓаните во здравството (од типот три бебиња во еден инкубатор, зарази од неисчистени апарати за дијализа и слично), една пратеничка од владејачката партија наперчено и' одврати на првата да не заборави дека во 2003 година во Свети Николе немало санитетско возило, а денес има!? Пратеничката група на ВМРО-ДПМНЕ особено се занимаваше со ланскиот снег при интерпелацијата за министерката за култура Канческа-Милевска. Наместо да ја бранат министерката од обвинувањата за уништените тендерски документи, за незаконските хонорари и од тврдењата за кои се појавуваат и документи дека „Скопје 2014“ станал пералница на пари, со неколкукратно зголемување на вредноста на спомениците, театрите и музеите од реалната - некои пратеници цитираа текстови од весници од 2003 за министри од СДСМ!

Министерот за финансии, во расправата за буџетот во 2011 година, често беше во вербален клинч со пратениците на СДСМ, со тезата дека нивната влада до 2006 правела лоши, неразвојни буџети, а дека буџетите на Владата на ВМРО-ДПМНЕ биле развојни, при што оној за идната година ќе бил најразвоен. Притоа, заборави да направи една проста калкулација. Претходната влада, со буџет од околу 6 милијарди евра, за четири години направи една централа, една започна (која сегашната власт уште ја нема завршено) и изгради едно парче автопат. Актуелната Влада за четири години, со вкупен буџет од околу 10 милијарди евра, не направи ништо капитално, ако не се сметаат селските тениски игралишта и сали, стадионот и, секако, незавршените содржини на кичот на „Скопје 2014“.

ВМРО и Груевски дојдоа на власт затоа што многу ветија. Бидејќи малку направија, сега се занимаваат со поранешни влади, извртуваат тези, релативизираат, сеат економски популизам и социјална демагогија, така замајувајќи ја јавноста како да е недоветна. Иако формално легитимитетот на власта не е спорен, фактички тој е веќе доведен во прашање. Но, лошите резултати, неостварувањето на стратегиските цели, големата сиромаштија и невработеност, стагнацијата на демократските процеси, се' помасовните митинзи, протестни маршови, надолниот тренд на финансиски-пропагандно стимулираниот рејтинг ќе ги натераат да сфатат дека им е доведен во прашање легитимитетот и дека ќе мораат да одат на избори.

Значи, за сегашниот снег се работи, па затоа актуелната власт треба да си го чисти и да одговара за него, а не да се занимава со ланскиот снег!