„Пред дождот“ на Манчевски стана првиот македонски светски класик
ДВД-изданието требаше да се појави порано и тажно е што не може да се набави во Македонија, рече Манчевски
Невена Поповска
Легендарниот американски издавач „Крајтирион колекшн“ го издаде македонскиот филм „Пред дождот“ на Милчо Манчевски на ДВД. Ова е прво комерцијално ДВД издание во светот на досега најуспешниот македонски филм. Настанот се одбележа вчера во просториите на НУБ „Св. Климент Охридски“, во присуство на премиерот Никола Груевски и претставници на Владата на Република Македонија, на дипломатскиот кор, како и бројни културни работници од земјава.
„Ова е уште една потврда на вредноста на културната дипломатија. Со ниедни пари не може да се купи тој публицитет, фактот дека земјава му станува поблиска на светот, и тоа преку едно уметничко дело, преку еден класик. Со ниедни пари не се купува да може дело од една мала земја да влезе во лектира на друга земја, да биде предмет на научни конференции, да биде дел од наставната програма на стотици универзитети во светот, и делото и авторот да бидат споредувани со делата на Џојс, Кундера, Бергман, Тарковски. Со ниедни пари не се купува и тоа десетици илјади пати да биде спомнувано во светските медиуми и на Интернет, авторот да има можност во интервјуа да го изнесува пред голем аудиториум својот став и да ја промовира земјата“, рече филмскиот критичар Марина Костова на вчерашната промоција.
На свеченоста присуствуваше и режисерот Милчо Манчевски, кој по повод издавањето на ДВД на филмот „Пред дождот“, истакна: „ДВД требаше да се појави порано и тажно е што тоа не може да се набави во Македонија. За мене беше тешка работа да се сними филмот, а другиот дел од работата беше задача на некој друг. Во Америка многу ретко влегуваат странски филмови и затоа за мене ова претставува голема работа. Јас пред се бев концентриран да го завршам филмот, а се друго е бонус. Сето ова е убава работа, но не е суштинска. Не сакам да ја намалувам вредноста на мигов, но за мене најважен е дијалогот на авторот со делото“. |
