Претходен број

Дали Ставрески е господинот Икс

Вицепремиерот крстосува низ Македонија последниве недели. Дали за тоа е влогот само локалните избори

Соња Крамарска

На прв поглед вицепремиерот за економски прашања, Зоран Ставрески, како да ја презеде премиерската палка од неговиот шеф Никола Груевски. Тој предводи партиски и владини делегации кои крстосуваат низ Македонија во пресрет на локалните и на претседателските избори. Зборува за успесите на Владата, ги буди заспаните вмровски гласачи, мобилизира нови од сите социјални и политички слоеви.

Ставрески службениот сив костим, што е синоним за највисоки државни функционери, го замени со фармерки и шарени кошули. Ја извади вратоврската како што тоа го направи лидерот на либералдемократите, Јован Манасиевски, пред почетокот на кампањата за парламентарните избори. Ја отвори сезоната на лов на гласачи, но тоа не е знакот по кој го распознаваат македонските граѓани.

Заменик- премиерот во Владата, кој пред два месеца наполни 44 години, провоцира прашања од поинаков вид. Најважното од тие прашања е дали тој е господинот Икс со кого ВМРО-ДПМНЕ ќе се претстави на претстојните претседателски избори.

Ставрески ги има карактеристиките за да го импресионира просечниот гласач на македонската верзија на политичката десница. Поседува магистерска титула од економија, има работна биографија во Светска банка во Вашингтон, нема зад себе политички или бизнис-афери. Што е најважно, тој е од кругот на најблиските соработници на партискиот лидер и актуелен премиер Груевски. Лојалноста е запечатена и на приватен план преку кумството на Ставрески на брачната двојка Никола и Боркица Груевски.

Во неговиот имотен лист што е достапен на Интернет- страницата на Државната комисија за спречување на корупцијата е запишано дека тој и неговата сопруга Антоанета поседуваат станови во Скопје, Охрид и во Америка, како и куќа во Скопје. Семеен автомобил на брачната двојка е „хонда-сивик“.

Прашан зошто доцнат со претставување на претседателскиот кандидат, Груевски минатата седмица во емисија на Канал 5 рече дека листата за номинации е стеснета, но дека се' уште ги анализираат личностите.

На прашањето, пак, дали тој ќе биде кандидатот за претседател на владејачката десница, Ставрески неодамна одговори дека „ВМРО-ДПМНЕ има во своите редови личности кои можат да ја извршуваат највисоката функција, но дека органите на партијата ќе решат кој ќе ја понесе претседателската номинација“.

Според возраста, Ставрески припаѓа на средната генерација македонски политичари, но со краткото политичко искуство би можел да се вброи и во младата генерација. Во Владата стекна статус и на гасител на пожари поради неговата инволвираност во менаџирањето на социјалните незадоволства.

Ако навистина е тој господинот Икс од тесната листа на партиски кандидати за највисоката функција во државата, ќе се потврдат анализите дека Груевски е многу скржав во ширењето на моќта надвор од неговата клика.

Ставрески, заедно со Мартин Протоѓер, Гордана Јанкулоска и Сашо Мијалков, се луѓето од најблиското опкружување на премиерот и лидер на владејачката десница.

Во ВМРО-ДПМНЕ има и други активни партиски личности кои го засилија своето присуство на теренот во пресрет на претстојното пролетно одмерување на силите. Активни се и Гордана Јанкулоска, и министерот за транспорт и врски, Миле Јанакиески, министерот за образование Перо Стојановски или шефот на дипломатијата, Антонио Милошоски. Но, никој нема толку нагласена активност како вицепремиерот Зоран Ставрески.

Најголемата владејачка партија, според сите анкети, ќе биде фаворит на претседателските и на локалните избори. Нивниот кандидат за претседател речиси со сигурност може да се прогнозира дека ќе биде и следен шеф на државата. Ризикот за пораз на кој било кандидат од кампот на владините партии е многу мал. Затоа се силни шпекулациите за името на личноста која ќе го понесе епитетот на нова политичка ѕвезда на македонското небо во наредната 2009 година.