Разрешената директорка премина кај Љубе

Разрешената директорка на Агенцијата за вработување, Билјана Јовановска, обвинува дека нејзината смена е исклучиво од политички причини. Вели дека,откако деновиве преминала во партијата на Љубе Бошковски, почнале и притисоците врз неа и пораки да се повлече од функцијата. Владата ги отфрла обвинувањата на Јовановска.

„Добивав пораки ’повлечи се или лошо ќе завршиш’, но јас не го направив тоа и затоа на последната седница на Владата е донесена одлука за мое разрешување. Поради ова, ќе поднесам неколку тужби, а едната ќе биде за незаконско сменување од функцијата, иако професионално ја извршував“, вели Јовановска. Таа тврди дека во три и полгодишното работење како директор не добила ниту една критика или забелешка и дека ги спроведувала сите реформи за постигнување европски стандарди. „Тоа што е најважно е дека јас не бев партиски послушник на Груевски и не останав приврзаник на неговата погубна популистичка политика. Владата требаше да одделува шест милиони евра за проектот за самовработување. Јас не се согласував со парите од овој проект да се покриваат нивните незаконски и ненаменски потрошени средства во буџетот“, тврди Јовановска. Решението, вели, го добила вчера, но во него било наведено образложение за нејзината смена.

Од Владата реагираат дека директорката на Агенцијата за вработување била разрешена на предлог на министерот за труд и социјална политика, Џелал Бајрами, поради слаби резултати во работењето. „Жалиме што Билјана Јовановска сака да ги затскрие својата непосветеност, непрофесионалниот однос и неодговорниот пристап кон работата со изнесување лажни алиби и изговори во јавноста“, се вели во писмената реакција од Владата. (Св.У.)