Португалија воведува строги мерки на штедење

Лисабон - Премиерот на Португалија Жозе Сократеш изјави дека владата на оваа земја ќе ги зголеми даноците и ќе ги намали платите во јавниот сектор, откако во средата слични вакви мерки воведе и соседна Шпанија. Португалија ќе воведе вонреден данок на приход до 1,5 отсто, ќе го зголеми данокот на додадена вредност за еден индексен процент, од 20 на 21 процент и за 2,5 отсто ќе го зголеми данокот на профит на големите компании и банки, пренесоа британските медиуми.

Владата, исто така, ќе ги намали платите на вработените на високи позиции во јавниот сектор и на политичарите за пет отсто, во напорите оваа година да го намали буџетскиот дефицит на 7,3 отсто од бруто домашниот производ, пониско од нивото од 8,3 отсто што го најави во март.

„Од своите сограѓани побарав да ги направат овие напори и да ја одбранат земјата, да ги одбранат еврото и Европа“, рече социјалистот Сократеш, по средбата на кабинетот на која овие мерки беа одобрени, што инаку се договорени и со опозициската партија ПСД, со цел да се обезбеди поддршка во парламентот.

Вчерашната одлука на Португалија дојде по драматичната недела за еврозоната, што почна со донесувањето на пакетот од повеќе стотици милијарди долари, што ги договорија ЕУ и ММФ за поддршка на послабите членки на еврозоната.

И Шпанија завчера обелодени пакет мерки за намалување на издатоците, во износ од 15 милијарди евра, вклучувајќи и намалување на платите за повеќето вработени во јавниот сектор за пет отсто и намалување од 15 отсто за вработените на подобро платените работни места. (МИА)