МАГАЗИН
Фан-клубовите оцена за популарноста
Ѕвездите кај нас како најголем репер за популарност ја сметаат бројката на членови на нивните фан-клубови
ИВОНА САЗДОВСКА
По примерот на светските имиња кои располагаат со илјадници фан-клубови насекаде низ светот, и домашните ѕвезди не заостануваат во однос на нив. Во помал или поголем број, речиси целата естрада има свој фан-клуб кој постојано работи и ја информира јавноста за тоа што е актуелно и што се случува со нивната ѕвезда.
Број еден според активностите како фан-клубови, секако, се оние на Тоше Проески, кои ги има околу сто насекаде низ балканските земји и кои покажаа одлична работа и хуманост, следејќи го патот на големата музичка ѕвезда. Соработувајќи и зголемувајќи го постојано бројот, целта на фан-клубовите е да ги известуваат сите за тоа колку големо и успешно име беше Тоше, како и ангажманите околу неговиот албум на англиски јазик.
Според многумина, фан-клубовите се најдобар репер за популарноста, бидејќи претставуваат скала на која се мерат успешноста и актуелноста. Веројатно, логиката вели колку повеќе членови толку поголема популарност.
Меѓутоа, од сето тоа се поставува прашањето колку бројките што се посочуваат на Интернет-порталите се реална слика за успешноста на пејачот или групата.
Со оглед на тоа дека Интернет-страниците едноставно се блокирани со разни опции да станете фан или антифан на некое лице, тогаш воопшто и не треба да чуди фактот дека постојано се варира со тоа колку е еден лик е омилен меѓу публиката или не.
На пример, новоформираниот клуб на интересната битолска група „Паркети“ постојано ја информира јавноста за успесите на своите миленици, па неодамна со гордост напиша на своите сајтови дека дуетската песна на „Паркети“ и Елена Ристеска „Сакам да те галам“ успеала да се најде на листата на Пјур Адрија чарт на Ем-Ти-Ви Адрија. За себе сметаат дека се максимално организирани, па освен профилот што го имаат изработено на My Space, сите заинтересирани може да ги сретнат и на останатите Интернет-сајтови за дружење како што се Hi5, Facebook и WAYN.
Во групата сопственици на фан-клубови се вбројуваат и ексклузивците на „М2 продукција“ Елена Ристеска и Ламбе Алабаковски. И двајцата како едни од најпопуларните имиња на македонското музичко небо уживаат популарност кај помладата публика, која не ја пропушта можноста редовно да ги следи на концертните настапи и навремено да информира за нивните ангажмани овде и надвор од државата.
Сопственикот на најубави балади кои во последниве години биле испеани на музичката сцена, Владо Јаневски, веќе деветнаесет години има свој официјален фан-клуб кој лично бил одобрен од него и кој постојано ги информира сите љубители на музиката на Владо за неговите идни ангажмани.
Според нив, начинот на пристап кон клубот е едноставна Интернет-покана за пријателство која подоцна подразбира навремено информирање за се' што е ново на професионален план кај Владо Јаневски. Досега официјалната бројка на членови кои ја сакаат неговата музика изнесува 45.
Ревноста на работата на фан-клубовите оди дотаму што дел од нив сериозно се обидуваат да го заштитат угледот на својата ѕвезда, известувајќи за евентуални лажни профили или клубови кои може да се најдат на Интернет-страниците.
Моментално актуелните Елвир Мекиќ и Јован Јованов на своите фанови им го овозможуваат задоволството да креираат фан-клубови чија бројка постојано се зголемува, за што говори и фактот дека овие двајца таленти постојано се присутни на сите музички случувања, што е добар показател за популарноста која ја уживаат кај својата публика.
Веројатно една од најкомуникативните пејачки кај нас Кристина Арнаудова не ја пропушта можноста да биде во чекор со своите фанови и постојано да им излегува во пресрет. За неа работата со нив е можеби и најинтересниот дел од музиката, бидејќи освен успешноста, фановите си земаат за право да ги коментираат и нејзините настапи, стајлингот и, секако, композициите.
Новите музички надежи кои рапидно бележат успеси на полето на музиката, секако, се момците од групата „Некст тајм“. За кратко време Мартин и Стефан успеале да придобијат голем број фанови, особено од понежниот пол. Ако се земе предвид дека публиката е таа која крева до облаци и повторно враќа на земја, не треба да чуди зошто сите сакаат да ја имаат на своја страна.
Момчето кое сите ги изненади и не' направи горди за време на реалното музичко шоу „Операција триумф“, Александар Белов, денес е горд на постоењето на својот фан-клуб во кој како негови пријатели се посочуваат и останатите студенти што беа дел од Академијата.
Во овој поглед не заостанува ни Влатко Лозановски кој, исто така, редовно е таргет на своите фанови. |
