Претходен број

Македонскиот мед не оди во Пекинг

Членовите не ја добиле финансиската поддршка која им била ветена од Министерството за земјоделство

Нема да се реализира планираниот извоз на македонски мед за Летните олимписки игри во Пекинг, објави граѓанското здружение „Еснафи“.

Причина за тоа е неопходната финансиска поддршка која членовите не ја добиле, иако им била ветена од Министерството за земјоделство.

„Требаше да извеземе 300 тони мед во Кина, за што добивме поддршка од вицепремиерот Зоран Ставрески, од министерствата за економија, за земјоделство и за надворешни работи. Но, кога тоа требаше да се реализира, Министерството за земјоделство, иако вети, не ги плати трошоците за петчлената делегација во висина од 11.500 евра“, објасни претседателот на здружението, Љубомир Ракиџиев.

Според Ракиџиев, откако пропаднало патувањето за Пекинг, здружението добило објаснување од Министерството за земјоделство дека средствата треба да ги одобри комисија што ќе се формира кон крајот на мај годинава. Министерството за економија, пак, платило патување за двајца од делегацијата, но било договорено никој да не замине.

Тој на прес-конференцијата најави дека на 8 и 9 август, истовремено со Летните олимписки игри, во Битола и во Велес ќе се одржи бизнис-форум за дегустирање македонски мед.

Овие тврдења ги демантираа откај министерот за земјоделство, според кои не им било ветено пари на медарите од „Еснафи“

„Никој од Министерството за земјоделство, ниту министерот ветил дека ќе ги покрие трошоците за патување на делегација од здружението во Кина. Министерството нема обезбедено финансиски средства за покривање такви трошоци и тоа му беше кажано на здружението“, изјави портпаролката Соња Трајкова.

Според неа, министерот Спасеноски јавно кажал дека ги поддржува сите иницијативи на македонските производители во рамки на можностите, а ако некој има сериозен бизнис, тогаш и ќе се обезбедат пари за трошоците во Кина. (МИА)