Претходен број

Се работат фигурите на Сандански и на Ченто за Музејот на ВМРО

Во првата нарачка испратена до Музејот во Украина се фигурите на седум историски личности

Јане Сандански и Ѓорче Петров се две од вкупно седум историски личности што почнаа да се изработуваат како восочни фигури наменети за музејскиот комплекс „Македонска борба“: Музеј на ВМРО и Музеј на жртвите од комунизмот. Минатата недела до Музејот на восочни фигури во Украина, каде што ќе се изработуваат поставките, била испратена нарачка за изработка на фигури на седум личности. Во оваа фаза, покрај на Сандански и на Ченто, нарачана е и изработка на фигурите на Крсте Петков Мисирков, Методија Андонов-Ченто, Методија Шаторов-Шарло, Павел Шатев и на Владислав Ковачев.

Од Министерството за култура, кое е носител на проектот за изградба на музејскиот комплекс, информираат дека првите фигури треба да бидат готови најдоцна за два или за четири месеци. Според договорот со Украинците, утврдена е динамика за изработка по две фигури за еден месец или, пак, да бидат изработени четири во рок од два месеца. Ликовите преточени во восочни фигури ќе бидат изработени во природна големина врз основа на секаков вид документација што ја поседува Архивот на Македонија. Помош, посочуваат од Министерството, во голем дел ќе дадат и потомците на историските личности, кои ветиле дека ќе достават фотографии и други битни детали за нив.

Инаку, според најавата, во Музејот на ВМРО, кој почна да се гради пред две недели на левиот брег од Вардар, планирано е да се постават 40 восочни фигури на историски личности кои придонеле за независна и слободна Македонија, а свое место ќе имаат и некои „негативци“. Во Музејот место ќе има и за Павел Шатев, Панко Брашнаров, Лазар Колишески, за султани, неименувани инспектори од УДБ-а... Целиот проект се очекува да биде готов за 14 месеци. За него се издвоени 9 милиони денари од буџетот. (Дс.Т.)