Кој колку се рекламирал во предизборието

Доставени извештаите за предизборните кампањи на партиите

Скопје - Доставените конечни финансиски извештаи на организаторите на изборната кампања за коалициите предводени од ВМРО-ДПМНЕ и СДСМ,и на политичките партии ДУИ, ДПА и на НДП, од формален аспект се коректни, доставени во законски утврдениот рок и пропишана форма, информира на денешната прес-конференција претседателот на Државната комисија за спречување на корупцијата (ДКСК), Воислав Зафировски.

Вниманието на ДКСК го привлекол извештајот за платено политичко рекламирање на СДСМ во А1 ТВ, во кој се наведува дека за 13 часа, 53 минути и 35 секунди, СДСМ на А1 треба да и' плати 430.239.855 денари. 

„Во истиот извештај се вели дека СДСМ платил 6.531.300 денари,  што значи останува долг од 423.708.555 денари, што е за цели 101.131.455 денари пречекорен максималниот законски лимит на средства што СДСМ може да ги потроши во изборната кампања. Но, затоа пак, во извештајот доставен од ДКСК од А1 ТВ, во рубриката побарувања, ставено е дека СДСМ нема долг кон телевизијата односно А1 ја донира кампањата на СДСМ со износ од 423.708.555 денари, појасни претседателот на ДКСК. За Комисијата е нејасен и ќе биде проверен и склучениот договор за цесија меѓу А1 ТВ, СДСМ и „Мулти медијатор“ Скопје, во вкупна вредност од 1.200.000 денари. Зафировски најави дека ДКСК ќе направи увид и во банкарските изводи и ќе се констатира дали средствата ненаменски се потрошени, односно се потрошени за неизборни цели.

Во извештајот на А1 ТВ  се прикажани попустите за рекламирање на ПЕИ, ОМ, ВМРО - НП, Нова Демократија, Достоинство, Демократската десница и ЛДП. Според прикажаното А1 ТВ дала донација за овие осум политички партии во износ од 12.215.097 евра.

- За ДКСК спорно е прашањето медиум кој има блокирана жиро сметка поради неможност да ги исплати побарувањата кон УЈП во висина од неколку милиони евра, дали воопшто може да се јави како донатор, а да не го коментираме износот на донацијата, за која согласно изборниот законик за правните лица не може да надминува повеќе од 5 проценти од вкупно остварениот приход за минатата година, појасни Зафировски.

Од конечниот финансиски извештај на ВМРО - ДПМНЕ може да се констатира, нагласи претседателот на ДКСК, дека организаторот на кампањата обезбедил приход во висина од 67.942.000 денари. Разликата меѓу приходите и расходите потрошени за реклама и платено политичко рекламирање, објавување огласи,... изнесува минус 204.402.493 денари. Тоа значи дека вкупниот износ потрошени средства не го надминува законски пропишаниот лимит.

ДУИ согласно доставениот извештај споредбено приходите и расходите има позитивен остаток од 6.488,50 денари.

Во конечниот финансиски извештај на ДПА, од вкупно прикажаните приходи и расходи, организаторот  остварил минус од 1.843.168 денари.

Од ДКСК како најкоректен извештај го оценија на НДП, во кој споредено приходната и расходната страна, има остаток од 917,00 денари.

ДКСК, беше потенцирано на денешната прес - конференција, по проверката на пристигнатите банкови извештаи ќе одлучи за покренување иницијатива за кривично гонење, како на организаторите на изборната кампања што немаат поднесено конечен финансиски извештај за партиите СДПМ, ЛДП, НДУ и ПДП, како и за СДСМ и за А1 ТВ.

По барање на новинарите Зафировски ги презентираше и доставените извештаи од телевизиите Сител и Канал 5.

Како што информира, согласно доставениот извештај од Сител, ВМРО - ДПМНЕ има искористено рекламен простор 22 часа 17 минути и 22 секунди. Вкупно Сител има побарувања од коалицијата во износ од 45.799.465, со одобрен попуст од 20  милиони денари.

Коалицијата предводена од ВМРО-ДПМНЕ во Канал 5 искористила 28 часа и 41 минута рекламен простор. Телевизијата има побарување од коалицијата, согласно нивниот доставен извештај, 100.017.690 денари, со даден попуст 10.230.00 денари.

- Благодарение на квалитетно подобрената изборна регулатива, првпат ДКСК има вистинска можност да направи сериозна контрола и увид во финансирањето на изборната капања во Република Маекдонија, рече претседателот на ДКСК, Воислав Зафировски. (МИА)