Претходен број

Фијаско на лидерската, Тачи го напушти состанокот

фото: Архива

Тачи обвини дека имало заговор на ВМРО-ДПМНЕ и ДУИ против ДПА

Оливера Војновска

Наспроти симболиката на големиот христијански празник Прочка, лидерската средба вчера доживеа фијаско, а четворицата лидери, еден ден пред официјалниот старт на изборната кампања, не успеаја да излезат со хармонизран став и единствена порака за демократски и регуларен изборен процес. Лидерот на ДПА, Мендух Тачи, видно изнервиран ја напушти лидерската средба само по десетина минути дека е „лут поради тоа што во државата владее селективно право и за изборните инциденти со стогодишни затворски казни се казнети само активисти на ДПА, додека оние на ДУИ целосно се амнестираат“. Тачи најави дека за ова веднаш ќе ги информира клучните странски дипломати и излезе со силни обвинувања дека премиерот и лидер на владејачката ВМРО-ДПМНЕ, Никола Груевски, и претседателот на ДУИ, Али Ахмети, уште пред вонредните парламентарни избори во 2008 направиле заговор против ДПА. Груевски се обиде да го маргинализира предвременото заминување на Тачи од средбата, не сакаше да ги коментира неговите обвинувања и упати охрабрувачка порака „дека е убеден оти има атмосфера и се создадени сите предуслови за фер избори“. И коалицискиот партнер ДУИ сакаше да го релативизира настапот на Тачи, па Џеват Адеми само ноншалантно прокоментира: „Оставете го, нервозен е човекот“! Адеми ја величеше ДУИ како одговорна партија, која е дел од власта и на која и' е многу важна евроатланската перспектива на државата.

Премиерот Груевски, инаку, честитајќи им го празникот на верниците од православна христијанска вероисповед, побара прошка од граѓаните и им се извини доколку нешто им погрешил. Тој на вчерашната средба во Клубот на пратениците дојде навреме, веројатно за да ја испочитува молбата на Ахмети состанокот да заврши до 14 часот, за кога беше закажана конвенцијата на ДУИ.

Тачи изјави дека ја напушти средба бидејќи, како што рече, забележал тотално несериозно однесување од страна на Владата. „Договорот да се процесуираат сите кривични пријави повторно важеше само за активистите на ДПА, кои се експресно казнети по три-чет��ри години. На сите активисти на Владата не само што не им се процесуираат пријавите, туку им се одложуваат судските рочишта за по изброите. Со ова само се докомплетира аргументот дека ВМРО-ДПМНЕ и ДУИ пред параламентарните избори направиле суперсценарио за комплот против ДПА . За ваквото несериозно однесување од денеска ќе ги информираме сите меѓународни институции, почнувајќи од амбасадата на САД, ЕУ, ОБСЕ“, изјави Тачи. Притоа, тој посочи конкретни личности од ДУИ чии случаи за изборни инциденти се поттурнуваат настрана. „Тоа се заменик-директорот на ’Македонски железници‘, Бесим Дехари, кој пукал на денот на изборите, и Талат Џафери, кој има тешко кривично дело за пукање со ’калашников‘ и ставање пиштол на глава на полицаец, чие судење е одложено. А луѓето од ДПА вчера се казнети со по три години затвор за две ливчиња. Министерката за внатрешни работи читаше некои процедури. Им возвратив дека не сум процедуралист, туку зборувам за политичка волја, таа е јасна - активистите на ДПА имаат стотина години затвор, а од ДУИ не е казнет ниту еден“, рече Тачи.

Според премиерот Груевски, лидерската средба не била со посебен дневен ред туку, како што рече, се сретнале еден ден пред кампањата за да сумираат дали тоа што договарале е горе-доле исполнето. „На средбата немавме некои детали, бидејќи повеќето од договореното е исполнето, освен неколку ситни сугестии и размислувања. Единствено, како и на минатите средби, имаше изразување револт од ДПА за судските постапки, за кои тие веруваат дека кога станува збор за нивните активисти оделе побрзо, а кога станува збор за активистите на ДУИ оделе побавно. Во секој случај, ако има некакви неправилности, ќе биде преземено тоа што е во наша моќ - разговори на министерот за правда со судскиот и обвинителскиот совет. Како и да е, јас по овие средби сум охрабрен дека направивме доволно подготовки и од политички и од институционален аспект да се обезбедат фер и демократски избори, кои ќе бидат победа на Македонија и нејзините граѓани“, изјави Груевски. Во врска со излегувањето на Тачи од средбата, премиерот одговори: „Мислам дека и тој и сите други имаат извлечено доволно поука од претходните избори и сите добро знаат дека обидите нешто да се добие на изборите со инциденти не завршуваат на добро. Инцидентите беа залудни, секаде каде што имаше изборите се поништија, учесниците добија кривични пријави и им се загорчија личните животи“. За обвинувањата за заговор против ДПА, кусо рече: „Нема такво нешто. Не би сакал да му возвратам, тоа нема да даде плод. Ги разбирам неговите мотиви, но не би сакал да ги коментирам“.

На обвинувањата од Тачи, Џеват Адеми одговори дека ДУИ не ги коментира судските постапки. „Му даваме шанса на судството, обвинителството да докажат дека се професионалци и независни. Доколку некои судски постапки против одредени прекршители на изборниот процес, кои можеби биле членови на ДПА, се докажани, тоа не е наша вина дека судството ги казнува тие што се фатени на самото место“, рече Адеми.

Тој рече дека ДУИ како партија се оградува од обидот на ДПА внатрепартиската криза да се наметне во целата држава.

В.д. лидерот на СДСМ, Зоран Заев, напуштањето на лидерската средба од страна на Тачи оцени дека „е резултат на нерасчистени работи од коалицијата ВМРО-ДПМНЕ - ДПА“. Заев изрази надеж дека тоа нема да има последици во постигнувањето фер и демокоратски избори.

Тој апелираше граѓаните на изборите да се однесуваат особено внимателно и да избегнуваат секакви можни тензични ситуации или појави на инциденти. „Овие избори се многу важни и се надеваме дека ќе надвладее мудроста за да ги постигнеме примарните цели кои се исправени пред Македонија - слободни и фер демократски избори“, изјави Заев.