Претходен број

Антикорупциска со писма ја прашува Владата како троши народни пари

„Транспарентност“ и НСДП ја прозваа Димовска да се изјасни за владините инвестиции

Катица Чангова


Државната комисија за спречување на корупцијата нема одговор дали Владата незаконски расфрла народни пари во предизборен период. За тоа дали премиерот и министерската свита со секојдневните непристојни инвестициски зафати ја злоупотребуваат функцијата во партиска кампања, ќе се знае дури по завршување на преписката Антикорупциска - Влада. Дали ова ќе се случи пред денот на гласањето, 22 март, не се знае, но ветувањето е дека ќе биде „во најскоро време“.

Ова на вчерашната прес-конференција, со многу воздржани тонови, го најави првата антикорупционерка Мирјана Димовска, која по преземањето на третиот претседателски мандат конечно се појави пред јавноста.

„Државната комисија веќе пушти допис до Владата со налог за сите наведени, најавени, започнати инвестиции во овој период, со цел да ја провери заснованоста на ваквите инвестициски работи и усогласеноста или неусогласеноста со Законот за спречување на корупцијата“, изјави Димовска.

Таа објасни дека почнувањето изградба на инфраструктурни и други објекти е законски забрането, но потенцира дека стои исклучокот „освен ако за таа намена претходно се обезбедени средства од Буџетот“.

Новата социјалдемократска партија и невладината организација „Транспарентност - Македонија“ ги прозваа антикорупционерите да се изјаснат за директното вложување буџетски пари во ек на изборна кампања, односно за крајно нетранспарентно и ненаменско трошење на јавните средства за промотивни владини кампањи.

Во пријавата поднесена вчера до Антикорупциската комисија, НСДП укажува дека Владата, а пред се' премиерот Никол�� Груевски, вицепремиерот Зоран Ставрески и министерот Миле Јанакиески во периодот по распишувањето на изборите ја злоупотребуваат службената должност.

„Финансираат или ветуваат финансирање на проекти кои се во надлежност на локалната самоуправа. Тоа го прават отворено, пред телевизиски камери, во присуство на кандидатите на ВМРО-ДПМНЕ за градоначалници и за претседател на државата. Поставуваат камен-темелници, сечат ленти и ветуваат дека Владата ќе вложува во општините доколку бидат избрани нивните кандидати“.

Со вакви активности, смета НСДП, власта може да влијае врз волјата на гласачите во изборниот процес, а тоа, пак, ги прави изборите нефер, нерамноправни и недемократски.

За „Транспарентност - Македонија“ е многу индикативно тоа што започнувањето на инфраструктурните проекти било прецизно планирано токму во предизборниот период.

„Сведоци сме на користење на службените возила, мобилни телефони и други средства за партиски цели - промовирање на кандидатите за претседател и градоначалник на владејачката партија, како и ставање на целата административна машинерија во кампањата, со што се врши злоупотреба на службената положба и овластување“, велат во „Транспарентност“.

И невладината организација „Мост“ на вчерашната прес-конференција обелодени дека нотирала повеќе прекршувања во заднината на предизборната кампања. Извршниот директор на „Мост“, Дарко Алексов, врз основа на 131 извештај од регионалните канцеларии, рече дека е регистрирано „користење државни ресурси за цели на кампањата, меѓу другото, службени возила, како и возила на јавни претпријатија“.