Владини седници да не се емитуваат под логото на МРТ
Советот за радиодифузија вчера порача доследно почитување на Законот за радиодифузија, предупредувајќи дека преноси или снимки од владини седници и други програмски содржини кои не се поврзани со работата на Собранието не смеат да се емитуваат под логото на Македонската радио -телевизија (МРТ).
Претседателот на Советот, Зоран Стефаноски, потенцира дека сервисот означен со логото МРТ не постои во Законот за радиодифузна дејност, а програмскиот сервис „собраниски канал“ е исклучиво наменет за емитување на активностите на Собранието кои се од јавен интерес .
„Согласно со член 121 од Законот за радиодифузна дејност и заради остварување на јавниот интерес, МРТ е должна, меѓу другото, да обезбеди програмите што се произведуваат и емитуваат да бидат заштитени од какво и да е влијание на власта, политички организации или центри на економска моќ“, рече Стефаноски. Тој нагласи дека меѓу МРТ и Собранието била склучена спогодба за емитување на други програмски содржини кои не се поврзани со собраниските седници, што е спротивно на одредбите на Законот за радиодифузна дејност.
„Со спогодбата за заедничко користење на мрежата за пренесување на сервисот наменет за активностите на Собранието, склучена меѓу МРТ и Собранието, а за чие постоење дознавме од медиумите, се суспендираат законските одредби“, укажа претседателот на Советот. (А.П.) |
