Кисинџер се извини за изјава стара 37 години

Зборовите за гасните комори и за Евреите во СССР, наводно, биле извадени од контекст

Вашингтон - Во напис во весникот „Вашингтон пост“, поранешниот американски државен секретар, Хенри Кисинџер, се извини за шокирачката забелешка за Евреите, дадена во 1973 година.

Коментарот на Кисинџер бил даден за време на разговорот со тогашниот претседател, Ричард Никсон, што бил запишан.

Во текот на разговорот Кисинџер рекол: „Емиграцијата на Евреите од Советскиот Сојуз не е цел на американската надворешна политика. Ако ги стават Евреите во гасна комора во Советскиот Сојуз, тоа не е американско прашање. Можеби би било хуманитарно прашање“.

Во написот во „Вашингтон пост“ Кисинџер се извинува за своите зборови.

Спомнувањето гасни комори нема место во која и да било политичка изјава. „Жалам што дадов таков коментар пред 37 години“, вели Кисинџер во статијата.

Обелоденувањето на разговорот меѓу него и Никсон ги шокира групите за заштита на Евреите, затоа што и Кисинџер е Евреин роден во Германија, кој избегал од нацистичкиот режим како дете, а денес се смета за произраелски настроен политичар.

Во извинувањето во „Вашингтон пост“ Кисинџер, меѓутоа, истакнува дека неговите зборови во врска со гасните комори и со Евреите во СССР биле извадени од контекст. (МИА)