Шестмина кандидати за ЗОИ во Ванкувер
Миодраг Мицковиќ
Најдобрите македонски скијачи во алпски дисциплини Антонио Ристевски, Александар Витанов и Дардан Дехари со настапите на скијачките натпревари во францускиот зимски центар Вал Торенс ја отвораат годинашнава сезона и ја започнуваат трката по ФИС точки за исполнување на нормата за настап на Зимската олимпијада 2010 во Ванкувер. Најдобрите скијачи од Македонија своите подготовки за годинашниве настапи ги почнаа на 1 јули со суви тренинзи, но и на снег во Австрија, Словенија и Русија. Според претседателот на Скијачката федерација на Македонија, Владо Пановски, целата програма за тренажниот процес е исполнета, набавена е и нова комплетна опрема за сите скијачи, алпинци и нордијци. Во овој период скијачите во алпски комбинации беа на подготовки неколку пати во Австрија, нашиот најдобар сноубордист Александар Кацарски е во Русија заедно со натпреварувачите од Словенија, а бијатлонците беа на куси подготовки во Шведска. Сите тие подготовки се насочени кон светските првенства в година, каде ќе се освојуваат ФИС точките за олимписката норма. СП за алпинци е во Вал Д’Изер, за бијатлон и сноуборд во Кореја, а најдобрите македонски нордијци ќе настапат на СП во Чешка.
Веќе се познати и кандидатите од Македонија за ЗОИ во Ванкувер. Во алпските дисциплини тоа се Антонио Ристевски, Александар Витанов и Дардан Дехари, во сноуборд Александар Кацарски, во бијатлон Гоце Илиоски и во нордиско трчање, Дарко Дамјановски.
„Се чувствува голем напредок кај сите скијачи. Сега имаме многу подобри услови. Верувам дека во Ванкувер барем еден скијач од Македонија ќе настапи со А-норма“, ни рече Антонио Ристевски.
Пановски, пак, се надева дека ќе имаме барем четворица во Ванкувер. Федерацијата сама успева да обезбеди околу 80 отсто од потребните средства за нормално функционирање: тренинзи, настапи, патувања, тоа е некаде околу 140.000 евра. Според пресметката недостасуваат уште околу 40.000 евра кои треба да се обезбедат, но засега тоа е проблем. Агенцијата за млади и спорт на сметка на Федерацијата има префрлено 350.000 денари, се очекува помош од другите спонзори.
|
