Претходен број

Трифун Костовски повторно спонзор на Вардар?!

Бизнисменот Мишо Поповиќ, наводно, се откажал од клубот што го презеде пред една недела

Миодраг Мицковиќ

Човек навистина повеќе не знае што се да напише за Вардар. За сите овие настани што се случуваа во нашиот најтрофеен клуб во последниве месеци. Премногу непроверени информации, шпекулации, една невидена задкулисна игра околу Вардар која само му штетеше на клубот кој никако да се соземе и да застане на цврсти нозе.

Последната информација што протече меѓу љубителите на фудбалот и навивачите на Вардар е дека Трифун Костовски ќе остане спонзор на клубот и дека ќе го води во пролетната сезона заедно со белграѓанецот Аца Булиќ, кој требаше да биде во раководниот тандем со Миша Поповиќ, толку посочуваното име како нов спонзор на Вардар.

Информациите говорат дека Мишо Поповиќ се откажал од Вардар, наводно затоа што Трифун Костовски не го испочитувал заедничкиот договор и не ги исплатил играчите на Вардар до 15 февруари како што тоа требало да го направи. Трифун Костовски според тој наводен договор бил должен да ги исплати сите долгови на фудбалерите на Вардар, плати, рати од договорите, кирии за становите во кои живеат заклучно до 31 декември. А потоа на сцена требаше да стапи Мишо Поповиќ и да ги преземе сите обврски кон играчите почнувајќи од 1 јануари.

Од сето тоа, барем до вчера немаше ништо. Играчите продолжуваат со штрајкот, не тренираат иако за две недели ги очекува стартот на новото првенство, засега немаат добиено ниту денар во последните три месеци. А кога ќе бидат исплатени тоа засега никој не можеше да ни каже.

Како што дознаваме, наводно, Трифун Костовски се договорил со поранешниот претседател на српскиот прволигаш Железник и екс претседателот на здружението на прволигашите на Србија Аца Булиќ заеднички да го спонзорираат Вардар. Шпекулациите говорат дека меѓу кумашините Мишо Поповиќ и Аца Булиќ има дојдено до кавга околу преземањето на Вардар и околу некои финансиски вложувања и дека меѓу нив „пукнала тиквата“. Токму поради тоа Мишо Поповиќ донел одлука да се повлече од Вардар. Како што е познато, Поповиќ најпрвин најави дека има намера да го смени и новиот претседател на клубот Бојан Захариев кој на оваа должност беше неполни десетина дена. Дури поради него беше одржано и собранието на Вардар на кое тој беше избран за претседател и запишан во Централниот регистар на Република Македонија наместо Трифун Костовски. Се прашуваме навистина на кого му требаше овој циркус. Не е познато и кој ќе биде нов тренер на Вардар, дали Србинот Саша Николиќ, дали ќе останат трите засилувања од Србија: Грубелиќ, Степановиќ и Осеница. Засега единствено засилување на Вардар е поранешниот репрезентативец на Македонија Ѓорѓи Христов бидејќи Јовица Трајчев за кого беше сигурно дека ќе потпише за Вардар стана член на Работнички. Тоа најдобро говори за ситуацијата во нашиот најдобар клуб, мислиме на поранешно време, сега е веќе далеку од зборот најдобар.

Да не заборавиме дека на Вардар над глава му виси и суспензијата од ФФМ и не ќе може да игра во продолжението на првенството се додека не го плати долгот на Цементарница во износ од 52.000 евра за трансферот на Васовски од Вардар во Ајнтрахт од Франкфурт. Проблеми колку сакаш.

Сите наши обиди телефонски да стапиме во контакт со поранешните спонзори на Вардар, со било кој од луѓето во клубот, за да ги провериме сите овие муабети што кружат низ скопската чаршија останаа попусти. Нивните телефони се „неми“, никој не се јавува, можеби во текот на денешниот ден некои работи околу клубот ќе бидат појасни. Едно е сигурно не знаеме каква игра играше Миша Поповиќ со Вардар и сигурно е дека е најдобро Трифун Костовски да остане во клубот, но со поголеми овластувања. Ако веќе ќе дава пари да не зависи од гласовите во Собранието на луѓето на Орце Камчев и на комитите.