Претходен број

Димитров не сака да биде во сенката на Јолевски

Попушта конструкцијата на тимот за преговори околу името што го промовира неодамна Владата

Соња Крамарска

Во очекување новиот преговарач за името, Зоран Јолевски, да дојде во Македонија и да биде одржана првата рунда консултации на државниот врв за натамошниот тек на преговорите, во Скопје продолжуваат шпекулациите околу новиот преговарачки тим што го најави Владата и во кој најави дека активно ќе учествувал и досегашниот преговарач Никола Димитров.

Преговорите околу името со Грција ќе продолжат, најави завчера премиерот Никола Груевски во изјава дадена за новинарите во Брисел, но не даде детали кога ќе се одржи и дали воопшто во скоро време ќе се одржи нова преговарачка сесија.

Меѓутоа, интересно е тоа што досегашниот преговарач Никола Димитров, кој при назначувањето на Зоран Јолевски за негов наследник беше посочен како личност што и натаму ќе остане во преговарачкиот процес заедно со Мартин Протоѓер, најверојатно ќе го одбие тоа.

Димитров смета дека е неумесно тој и натаму да остане директно инволвиран во преговорите.„Со оглед на мојата директна инволвираност во процесот околу името, имам одговорност да се ставам на располагање за да има континуитет, а и во интерес на државата. Меѓутоа, оваа улога ја гледам само како давање совети, консултации и слично. Но, не гледам логика за мое натамошно учество во самите разговори. Мислам дека не би било соодветно такво нешто“, ни изјави Никола Димитров.

Димитров важи за ѕвезда на македонската дипломатија, а неговата кариера се градеше токму во кризните моменти за Македонија. Тој учествуваше, заедно со претседателот Борис Трајковски, во справувањето на бегалската криза во 1999 година, потоа за време на конфликтот во 2001 година беше советник за национална безбедност на Трајковски, а од 2003, па се' до неговото сменување беше преговарач во спорот за името со Грција. Димитров моментно е национал��н координатор во процесот на зачленувањето на Македонија во НАТО, но како што се шпекулира, нема долго да остане на таа позиција. По епизодата со неговото сменување од страна на Црвенковски од функцијата преговарач, Димитров се' почесто може да се види во друштво со премиерот Груевски, со кого до неодамна одржуваше студени односи, особено по интервјуто за Канал 5 телевизија по самитот на НАТО во Букурешт, во кое Димитров ја критикуваше македонската стратегија во спорот околу името.

Неофицијалните информации на „Утрински весник“ се дека Димитров и шефот на дипломатијата, Антонио Милошоски, ќе бидат застапници на тужбата што ја поднесе нашата земја против Грција пред Меѓународниот суд на правдата во Хаг.

Димитров, сепак, одби да ги коментира таквите информации.

Од Кабинетот на претседателот Бранко Црвенковски засега нема никакви информации за тоа каква соработка очекуваат со новиот преговарач Зоран Јолевски, кој е избран од страна на премиерот Груевски. Црвенковски при настапот во парламентот поврзан со преговорите за името рече дека целата одговорност му ја препушта на Груевски, како што рече, за да се одбегне двојството во стратегијата меѓу него и премиерот.

Оттогаш Црвенковски како да дигна раце од преговорите и своите ставови ги кажува на трибини низ земјава, иако како шеф на државата има уставна улога во надворешната политика и тој го назначува преговарачот во спорот со името.

Јолевски и претходниот преговарач Никола Димитров заедно работеа во Кабинетот на поранешниот претседател Борис Трајковски, каде што Димитров беше советник за национална безбедност, а Јолевски беше шеф на Кабинетот на претседателот. Нивните односи, велат други членови на претседателскиот кабинет од тоа време, биле коректни, но без посебна блиска соработка.

Ова е мошне важен момент за атмосферата во тимот што го најави Владата во натамошниот преговарачки процес и во судскиот спор против Грција во Хаг, кои се поврзани еден со друг.

Според нашите информации, последниот предлог на посредникот Метју Нимиц се смета за мртов, бидејќи македонската страна на него одговорила со двојната формула. Оттука, процените се дека наредната сеанса на македонскиот преговарач Јолевски и грчкиот преговарач Адамантиос Василакис со Нимиц би била во насока на подготовка на евентуален нов предлог до двете страни во преговорите.

Со оглед на тоа дека божикните празници се на прагот, а тоа е и главната причина за доаѓањето на Јолевски во Македонија, повеќе од јасно е дека смената на преговарачот Димитров и тужбата што ја поднесовме во Хаг сериозно го забавија преговарачкиот процес и го влошија амбиентот и на домашен план и во самите преговори во кои активно учествуваат Обединетите нации и САД.