И вчерашниот обид за почнување на повторениот судски процес за седумдесет и двајца обвинети во случајот „Змиско око“ остана нереализиран. Вчерашното судско рочиште, кое доаѓа само петнаесетина дена по пресудата на Европскиот суд за човекови права во Стразбур, доживеа уште едно одложување поради неприсуството на тројца обвинети. По укинувањето на првостепената пресуда ова е веќе петто одложување на најмасовното судење што е регистрирано во аналите на македонското правосудство.
На раководителите и на инкасаторите на наплатните рампи им се судеше поради злосторничко здружување и злоупотреба на службената положба. Тие беа приведени кон крајот на 2007 година, а веќе во февруари идната година почна судскиот процес што резултираше со изрекување пресуда само за 13 лица.
Првостепената пресуда во декември минатата година беше укината и предметот беше вратен на почеток. За притворот на обвинетите инкасатори во случајот „Змиско око“ расправаше и Судот во Стразбур, кој пресуди дека на секој од нив државата треба да им исплати по 2.000 евра за трошоци. (Љ.С.)
