Ќе има тужби за кошмарот со пасоши

Сите граѓани од Македонија за итни пасоши треба да доаѓаат во Скопје

Даниела Трпчевска


Жителка на скопската населба Тафталиџе ќе ја тужи државата доколку и' пропадне аранжманот од 600 евра, што го уплатила за зимување во Бугарија, доколку навреме не го добие пасошот за своето дете. Таа тврди дека семејните планови за зимување во Банско прераснале во вистински кошмар оној момент кога се обидела да им извади биометриски пасоши на децата. Како што тврди, на 17 декември аплицирала за нов пасош за детето, кое било и фотографирано и биле заведени сите податоци, но документот се' уште не може да го добие, иако и' било кажано дека ќе биде готов на 2 јануари.

„Со денови одев во Пасошко, проверувајќи до каде е постапката, за вчера да ми кажат дека пасошот на моето дете воопшто не е ни почнат да се изработува“, вели револтираната жена, која се јави во нашата редакција.

Во меѓувреме, бидејќи немала друго чаре, таа направила последен обид за да го спаси веќе аранжманот што им бил уплатен за зимување. Затоа го зела стариот пасош на синот и се обидела да му извади виза за патување во Бугарија. Арно ама, и тука се случил курцшлус, оти системот на амбасадата не ги прифаќа патните исправи што имаат помалку од три месеци важност. „Ако ми пропаднат парите и не успеам да заминам на платениот аранжман, ќе ја тужам државата“, вели револтираната скопјанка.

Ова е само од многубројните примери на граѓани кои секојдневно се јавуваат во нашата редакција, известувајќи за проблемите со кои се соочуваат околу аплицирањето и подигнувањето на новите лични карти и пасоши. Од МВР велат дека се свесни за проблемите што настануваат поради огромниот наплив на граѓани кои сакаат да ги заменат поскоро старите документи со нови. Тие уверуваат дека секојдневно преземаат мерки за да го растоварат метежот, за што е во план отворање нов пункт во Бит-пазар, а се бара чаре и за итните пасоши, кои место да се издаваат во Скопје, во план е да се дистрибуираат по градовите.

„Новиот пункт во полициската станица ’Бит-пазар‘ би требало да профункционира до крајот на месецов, откако ќе се обезбедат сите заштитни стандарди“, вели помошник-министерот за информирање во МВР, Иво Котевски. Хаосот, нервозите и турканиците во Пасошко е планирано да се средат и со воведување нов видеосистем за информирање на граѓаните.

„Информативните екрани и видеосистемот е планирано да бидат поставени во ходниците на Пасошко и на него ќе се објавуваат информации од Кол-центарот. Така граѓаните ќе добиваат точни податоци за закажаните термини, времето и шалтерот на кој треба да ги поднесат документите. Оваа новина би требала да профункционира од февруари“, информира Котевски.

На тој начин, надлежните се надеваат дека ќе воведат некаков ред, бидејќи голем дел од граѓаните, уплашени дека ќе ги пропуштат термините, доаѓаат неколку часа порано, создавајќи уште пого��ем метеж.

Проблем се јавува и кај иселениците, кои ограничено време престојуваат во земјава и кои често не можат навреме да ги заменат старите документи со нови.

„МВР се обидува да им излезе во пресрет на сите, но се случува поголемиот дел од иселениците воопшто да немаат закажано термини, а со цели семејства доаѓаат во службите и бараат да им се издадат нови документи. Бидејќи веќе имаат уплатено за итни пасоши, се обидуваме да им излеземе во пресрет. Тоа е една од причините зошто се создаваат метежи пред кабините“, велат во полицијата.

Покрај управните згради во Скопје, МВР има отворено повеќе пунктови во градовите, каде што граѓаните можат да аплицираат и да ги подигнуваат новите документи. Но, сепак, Пасошкото во МТВ е преплавено со граѓани од другите градови кои доаѓаат во Скопје да ги подигнат документите.

Постар жител на Дебар тврди дека по трет пат доаѓа во Скопје за да го подигне пасошот, но постојано добива ист одговор - дека документите не му се готови.

Проблемот, според Котевски, настанува само со итните пасоши, кои граѓаните од цела Македонија, согласно со процедурите, мора да дојдат лично и да ги подигнат од Пасошкото во МТВ.

„Се разгледуваат варијанти да може и итните пасоши да се испраќаат во градовите каде што ќе ги подигнуваат апликантите. На тој начин ќе се растоварат службите во Скопје и граѓаните нема да се изложуваат на трошоци да патуваат во главниот град. Во опција се неколку решенија – или да се испраќаат возила со обезбедување кои ќе ги транспортираат пасошите до градовите или тие да се доставуваат до неколку регионални центри“, објаснуваат надлежните.

Котевски е категоричен дека од моментот кога ќе се прифати барањето за итен пасош, на граѓаните им се излегува во пресрет во законски предвидениот рок од 48 часа. „Сепак, постојат и исклучоци, при што се потребни подолготрајни проверки на граѓаните пред да им се издаде патната исправа. Можно е пасошот да задоцни и доколку се направи некои грешки или пропусти во податоците што треба да се внесат“, вели тој.

Проблемите со Кол-центарот продолжуваат. Телефонската линија сега е растоварена, но граѓаните често се случува да бидат изоставени од списоците, иако чекале со месеци. Жителка на скопската населба Капиштец на 23 ноември закажала термин за вадење нов пасош. Документите требала да ги поднесе на 4 јануари и откако неколку часа чекала на ред, доживеала невиден шок кога и' кажале дека воопшто ја нема на списокот. „Вакво чувство на малтретирање и пониженост не сум почувствувала досега, а сум живеела во четири европски држави. Ова е срам за државата“, вели седумдесетгодишната Георгија Ч.. Според Котевски, досега се случило да имаат проблеми само еднаш, кога поради проблеми со системот, група граѓани биле изоставени од списоците. Доколку се јават проблеми, тој вели дека надлежните вршат проверки на снимките во Кол-центарот со цел да се утврди дали навистина се направени пропусти.

Други, пак, иако биле известени дека им се готови документите, исплашени од големите турканици се одлучуваат воопшто да не ги подигнат документите. „Кога појдов утринава по документите и кога видов толпа луѓе како се туркаат, имав чувство дека комплетно го губам човечкото достоинство и дека никој во државава не води сметка за своите граѓани“, вели Силвана Б. од населбата Центар.

Скопјани се жалат дека им е преку глава од ургенции и пикање преку ред, додека тие чекаат трпеливо со часови да се фотографираат. Од МВР апелираат до сите оние што ќе забележат неправилности во работењето или доколку видат некој да турка луѓе преку ред, да го пријават случајот со цел да се санкционира.

„Вработените во МВР можат да аплицираат за документи надвор од работното време, а се подготвуваат и посебни списоци, на кои им се закажуваат термини обично за време на викендот“, велат во МВР, но не ја исклучуваат можноста дека некој од нивните вработени би можел да ургира и да вметне свои роднини и пријатели преку ред за вадење нови документи. Но, за ваквите случаи досега не биле информирани.

До минатата недела, МВР има примено 17.200 барања за итни пасоши, а последниот термин за нивно закажување беше 29 јануари. Досега се издадени 65.000 пасоши по редовна постапка. (Д.Т.)