Кирил Дојчиновски

фудбалски тренер

Го прославувам мојот личен јубилеј, ден-меѓник и во мојата кариера и во животот. Пред 40 години, на денешен ден, играв на „Маракана“ во Рио де Жанеиро, во дресот на репрезентацијата на Југославија, заедно со Мето Спасовски, на меч против Бразил (2:2). Мето го постигна првиот гол, а јас го чував најдобриот играч на светот Пеле, кој со овој меч се прости од репрезентацијата на Бразил.

Горазд Чаповски

музичар

Главниот настан во денот ми е промоцијата во КИЦ во 13 часот на спотот за новата песна на „Мизар“ „Белото море“. Со песна и спот, всушност, го најавуваме нашиот нов албум „Детето и белото море“, каде што вокалите ги пее хорот „Хармосини“.

Маре Мицкова-Чекалова

учителка

Денеска за мене е тажен ден, кога и официјално со последната активност во „Александар палас“ се збогувам со мојата педагошка работа. Но, сепак, и понатаму ќе другарувам со децата преку играта „Бонтон преку телефон“. Сакам да се простам со моите ученици од предучилишна возраст, објаснувајќи им што е тоа пензионирање и дека тие се детелинка од букетот со 42 детелинки, 42 генерации на мои воспитаници.