Скулптура на Александар Македонски и во Атина

Скулптурата е готова уште од 1993 година, но не е поставена зашто не била одредена локација

Од нашиот дописник
Миркица Поповиќ

Атина – По поставувањето на скулптурата „Воин на коњ“ во Скопје се повеќе се разгоруваат дебатите и барањата за поставување на скулптура на Александар Велики и во Атина. Според грчкиот весник „Та неа“, во текот на изминатата недела се зголемиле притисоците врз градоначалникот на Атина од различни пратеници и политичари, дури и од оние на ПАСОК, за поставување на скулптурата на Александар, изработена уште во 1993 година, на плоштадот „Котција“ во центарот на Атина, веднаш спроти зградата на општината и градоначалникот. Досега една од главните пречки што споменикот не е поставен е неможноста да се најде соодветна локација за него.

Авторот на десетметарската скулптура што го претставува младиот Александар на коњ, уметникот Јанис Папас, побарал споменикот да биде поставен на „Котција“ бидејќи го изработил токму за овој плоштад. Проблемот е во тоа што на плоштадот веќе има централна скулптура и фонтана. Но, доколку почне да се размислува да се постави споменикот ќе треба да се дадат 60.000 евра за прелоцирање на постојната скулптура и споменикот. Меѓутоа, како што пренесува „Та неа“, авторката на скулптурата што моментно се наоѓа на плоштадот спроти општинската зграда, Софија Вари, не е расположена да се преместува нејзината скулптура затоа што и таа била изработена специјално за плоштадот и досега немала добиено предлог за нова локација.

Дискусијата за поставување на споменикот може да биде ставена на дневната агенда на градскиот совет на Атина, меѓутоа, поради проблемите со уметниците, голема е веројатноста оние што притискаат за поставување на скулптурата на Александар да почнат да предлагаат нови локации за поставување на споменикот во центарот на Атина. Како што пренесува весникот, перипетиите со оваа скулптура очигледно ќе продолжат без да биде извесно каков исход ќе имаат. Грчкото Министерство за култура ја купило скулптурата во 1993 година, меѓутоа поради неможноста да се најде локација за неа, ниту во Солун ниту во Атина, таа останала во дворот на уметникот Папас, кој сега е дел од разгранокот на музејот „Бенаки“.