Момчињата во одбрана на професорот наклеветен за педофилија
Во гимназијата во Демир Хисар за малку е избегната и тепачка помеѓу учениците
Битола - Во демирхисарската гимназија ескалираат состојбите откако седумдесетина ученици завчера ја бојкотираа наставата со тврдење дека нивните соученички го наклеветиле професорот по социологија Петар Шилковски за педофилија. Меѓу момчињата на протестот имаше и едно девојче. Според нив, професорот Шилковски коректно се однесува како наставник, а минатонеделниот протест на девојчињата бил политички инструиран.
„Професорот го познавам подолго време, не е способен да стори такво нешто. Тој е со 25 години работно искуство и не може да стане педофил само по четири дена откако жена му стана директорка. На девојчињата што протестираа неговата сопруга им беше класна раководителка“, рече единственото девојче на завчерашниот протест. „Сакаме да се врати, нема причина да биде истеран. Никого не гибнал. Тој е близок со сите, сака да се шегува, многу ни помага“, додаваат момчињата.
Протестот ја вжешти атмосферата во гимназијата и за малку беше избегната тепачка меѓу двете страни. Момчињата не им дозволуваа на девојчињата да влезат во училишната зграда и да одат на настава и со навредливи зборови скандираа против своите соученички. Ситуацијата се обиде да ја смири градоначалникот Љупчо Најдовски, кој дојде во гимназијата. Тој ги повика учениците да се вратат во училишните клупи. Според него, средношколките се политички изманипулирани, а мотивот е тоа што сопругата на Петар, Соња Шилковска, од неодамна е назначена за директорка на гимназијата.
„,Меѓу учениците слушам дека биле потплатени двете ученички што го обвинија професорот. Така се зборува во чаршијата“, изјави Најдовски. Ваквата негова изјава ги револтира девојчињата, кои отидоа да се расправаат во неговиот кабинет. Една од нив по излегувањето рече дека му кажала на градоначалникот дека не треба да ја слуша чаршијата, туку да работи на решавање на проблемот. „На Најдовски му рековме дека и за него во чаршијата се слушаат разни работи“, изјавија средношколките.
Иако протестот на момчињата се случи само еден ден по враќањето на градоначалникот од службено патување, тој ја отфрла можноста ��ека некој ги инструирал средношколците за овој бојкот.
„За жал, во она што се случи со професорот е вмешана политиката. Ако се докаже дека Шилковски е виновен, тој повеќе нема да предава. Јас ќе бидам на страната на правдата“, рече Најдовски .
Минатата недела десетина ученички од гимназијата „Крсте Петков Мисирков“ во Демир Хисар го обвинија професорот Шилковски дека подолго време им нуди непристојни предлози и ги допирал по телото. Тој ги отфрли обвинувањата, но Наставничкиот совет донесе одлука професорот да се отстрани од настава. Сега е задолжен во училишната библиотека се' додека полицијата не ја заврши истрагата. (А.Б.) |
