Поглед

Морален помор

Горан Адамовски

Безработица, транзиција, лажни вредности, грешни идоли, распаднати семејства, нефункционални образовни институции, апатија во сегашноста, недоверба во иднината...

Апсолутниот пад на моралните вредности е видлив на секој чекор. Само што од ден на ден станува се' побизарен. Кога ќе слушнете дека 24-годишно момче сексуално злоупотребило 13-годишник во манастирски одаи - единствено преостанува да се прашаме што ќе биде следно?

„Во наше време не беше така. Вие младите гледате многу американски филмови, плус Интернетот и затоа сте станати такви“, е еден од „аргументите“ на по��озрасните граѓани. Социолозите и психолозите ќе ви кажат дека случаи на педофилија, полови напади и силувања имало секогаш, само што во „тоа“ време било срамота да се признае и јавно да се говори.

Како да се најде излез од силуваната сегашност? Според стручните лица, семејството и училиштата се главен играч во решението. Здраво семејство во кое родителите ќе им посветат соодветно внимание на своите деца и образовни институции каде што децата ќе бидат научени на моралните вредности.

Но, во голем број случаи, децата се запоставени дома, бидејќи родителите водат битка за преживување на месецот, а училиштата им стануваат полигон за искалување агресија.

Околината им сервира да се воодушевуваат на сомнителни ликови, а изопачени возрасни мозоци им „помагаат“ да се афилираат во зрели личности. А, утре ќе имаат свои семејства.

И потоа, кога ќе ни се случи урнисување на моралот, јавноста ќе бележи, експертите ќе укажуваат, а надлежните ќе се чудат.