Осомничените адвокати во редовна постапка

Скопските адвокати Ратко Боцевски (62) и Благица Арсовска (51), кои од пред два дена МВР ги осомничи дека сториле кривично дело противзаконско посредување, ќе бидат третирани во редовна кривчина постапка. Како што неофицијално се дознава, постапката што допрва следува против адвокатите, ќе биде во редовна постапка, што, пак, значи дека тие нема да бидат третирани од Одделенијата за борба против организираниот криминал и корупцијата на Обвинителството и судот. Ова значи дека за нив ќе биде поведена кривична истражна постапка, која не претпоставува итност во работењето, а најверојатно Обвинителството ќе се задржи само на ова, односно нема да му предлага на судот и притворска марка. До ваков расплет на оваа афера, најверојатно, доаѓа поради измените во Законот за кривична постапка, но ова не значи дека тие нема да одговараат за делото за што се товарат.

Двајцата познати скопски адвокати се најдоа на удар на МВР, по пријава на прилепчанка, која ја информирала полицијата дека од неа најпрво биле побарани 20.000 евра, а потоа 14.000 евра, а за возврат требало да издејствуваат поволна пресуда за нејзиниот брат. (Љ.С.)