Рестартиран поранешен „Силмак“

Новите газди на поранешен „Силмак“, групацијата ЕФТ, го рестартира производството. „Метал инвест ЕФТ“ е новото име на комбинатот во кого за почетокот ќе почнат да работат две печки, од постојните девет. На работа се вратени околу 240 работници, или 99 отсто од досегашните вработени и се направени мали измени во менаџерскиот тим. Директор на „Метал инвест ЕФТ“ ќе биде Митко Кржевски.

Во иднина се планира зголемување на производството, а со тоа и вработување нови лица, најави раководството на вчерашната прес-конференција. Од компанијата посочија и дека имаат обезбедено суровина за работа до крајот на годината, а производството на феросилициум ќе биде наменето традиционално за европските пазари, пред се', во Словенија, Италија, Германија, Словачка и од Чешка.

Според управителот на „Метал инвест ЕФТ“, Кочо Анѓушев, отсега компанијата функционира посебно и нема ништо спорно со другите доверители, кои поведоа стечајна постапка за имотот на „Силмак“. Отплатени се хипотеките и со тоа на легален начин е стекната сопственост врз дел од имотот на „Силмак“. Анѓушев посочи дека идејата на новите сопственици е да се рестартира фирмата и да се продолжи со производство. А, во периодот што следува ќе се произведува и силициум метал, кој има повисока пазарна цена од феросилициумот.

Инаку, новиот сопственик влезе во „Силмак“ пред околу два месеца и по направените анализи и ремонти, сега донесе одлука да започне со производство. (М.Т)