Имотот на Амди и Елвис Бајрам под лупа на даночниците

Имотната состојба на пратеникот Амди Бајрам и на неговиот син Елвис Бајрам, кој е градоначалник на Шуто Оризари, е под лупа на даночниците. Во предистражната постапка Антикорупциската комисија утврдила нецелосни податоци во анкетните листови на таткото и на синот Бајрам, па затоа иницирала постапка за испитување на потеклото на нивниот имот до Управата за јавни приходи. Надлежните институции, Катастарот, Централниот регистар, Министерството за внатрешни работи веќе ги проверуваат недвижниот имот, сопствеништвото врз фирмите и имотот во возила на име Бајрам.

„Нашето истражување потврди дека Амди и Елвис Бајрам не го пријавиле целосно имотот“, изјави вчера претседателот на Државната комисија за спречување на корупцијата, Илми Селами. Тој нагласи дека за секој функционер, што не дава детаљна информација за својот имот во анкетниот формулар, по автоматизам се поведува постапка за испитување. Епилогот, рече Селами, е 70 отсто оданочување на нелегално стекнатиот имот, конфискација и кривична пријава.

На Интернет-страницата на Антикорупциската комисија www.dksk.org.mk каде што се објавени анкетните листови на избраните и именуваните функционери, пратеникот Амди Бајрам нема дадено никакви податоци за имотот. Но, Елвис Бајрам во графата за имот на родители запишал куќа од 50 квадратни метри во Скопје, вредна 1,23 милиони денари. Како свој имот првиот човек на скопската општина Шуто Оризари пријавил куќа од 600 квадрати во изградба, со вредност од 3,69 милиони денари.

Во Антикорупциската комисија велат дека постапките за испитување на имотот на функционерите се многу долги и траат најмалку три месеци. Антикорупционерите сметаат дека даночниците мора да направат повеќе за зајакнување на одделот за испитување на имотната состојба, со цел побрзо завршување на постапките, а тоа, велат ќе биде најдобар превентивен пример за другите функционери. (К.Ч.)