ЕУЛЕКС не знае дали е надлежeн за злосторствата

Мисијата на ЕУ на Косово, ЕУЛЕКС, не знае дали е надлежна да ја води истрагата по извештајот на Советот на Европа за трговијата со човечки органи, за што се осомничени поранешната ОВК и актуелниот косовски премиер, Хашим Тачи, пишува „Тајмс“.

Според претставници на мисијата ЕУЛЕКС, „можеби нема јурисдикција“ врз случајот во кој се обвинува премиерот на земјата каде што е стационирана мисијата.

Инаку, известувачот Дик Марти изјави дека Швајцарија со години знаела за наводната вмешаност на косовскиот премиер Хашим Тачи во трговијата со наркотици и човечки органи и поради тоа му забранила влез во земјата.

„Името на Тачи може да се најде во полициските досиеја, но од политички причини ништо не се презеде за тоа“, наведува Марти за швајцарскиот весник „НЗЗ ам зонтаг“. Сојузната служба за миграција и сојузната полиција Федпол, повикувајќи се на заштита на податоците, ништо не кажаа за евентуалната забрана за влез, но Дирекцијата за надворешни работи потврди дека Берн во 2002 година му забранила влез на Тачи во Швајцарија. (МИА)