Америка затечена

САД внимателно најавија дека ќе ја продолжат соработката со косовскиот премиер Хашим Тачи, и покрај извештајот на Советот на Европа што го доведува во врска со злосторства. Портпаролот на Стејт департментот Филип Краули оцени дека тие тврдења "нема фундаментално да ги нарушат американските односи со Приштина", но САД барале фер истрага. Ова беше очекувано ако се знае дека токму демократската администрација во Белата куќа во 90-тите (Бил Клинтон и Медлин Олбрајт) го издигна Тачи „од пешак до кралица“, како што нотираше еден весник, и затоа не е логично демократите, кои одново се во Вашингтон да се откажат од него. Потешко ќе биде со европските лидери и јавност, кои се почуствуваа измамени, а сега и затечени од обвинувањата на Марти за учество во злосторства на човекот со прекар „Змија“. „Ако ЕУЛЕКС, мисијата на ЕУ во Косово, сака да биде веродостојна, ќе мора да спроведе независна истрага во врска со 'Тачи и Ко'… “ - забележа германскиот Тагесцајтунг.