Комплетната политичка елита на службен пат во странство

Тројцата први луѓе во државата, претседателот Иванов, премиерот Груевски и спикерот Вељаноски, водат според привлечноста на дестинациите - Канада, Бразил, Аргентина, Мексико и Кипар

Татјана Поповска

Канада, Бразил, Аргентина, Мексико, Кипар, Германија, Полска, Белгија, Франција, Унгарија, Словачка - ова се главните дестинации кон кои на почетокот на неделава се упатија голем дел од државните функционери и пратеници на Македонија. Некои со помали, некои со поголеми делегации, тргнаа во лов по странски инвестиции, на форуми за економската криза, за демографските промени, за безбедносни прашања или на средби за евроинтеграцискиот процес на државата.

Сепак, тројцата први луѓе во државата претседателот Ѓорге Иванов, премиерот Никола Груевски и претседателот на Собранието Трајко Вељаноски ги одбраа најпривлечните дестинации.

Шефот на државата Иванов заедно со сопругата Маја до наредниот понеделник ќе престојува во работна посета на Канада и САД. Од неговиот Кабинет велат дека не станува збор за голема делегација, која покрај претседателот и неговата сопруга ја сочинуваат уште пет лица и обезбедувањето чија бројка не ја соопштуваат. Во делегацијата покрај службено лице за протокол има и еден советник на претседателот, одговорно лице за односи со јавност, советник за надворешна политика и еден преведувач.

Владината делегација предводена од премиерот Груевски, која неделава е во потрага по странски инвестиции во Бразил, Мексико и Аргентина ја сочинуваат и министерот за финансии Зоран Ставрески, министерот за привлекување на странски инвестиции Веле Самак и директорот на агенцијата за привлекување на странски инвестиции Висар Фида. Од службените лица познато е дека со нив е портпаролот на Владата Александар Ѓорѓиев. Бројот на обезбедување и за оваа делегација е тајна.

Најмала е делегацијата на спикерот Вељаноски кој беше во неколку дневна посета на Кипар, каде учествуваше на конференција на претседатели на парламенти од земјите на ЕУ, а кој според најавите требаше да се врати синоќа. Од неговиот кабинет вчера информираа дека во делегацијата покрај Вељаноски, се и неговиот шеф на Кабинет Марјан Маџоски и уште еден службеник. Наспроти тоа, извори од Собранието тврдат дека во Кипар се наоѓаат две службенички - неговата секретарка Катерина Бајдовска и преведувачката Светлана Ангеловска.

Нивните патувања во светот не се и не треба да бидат спорни ниту за јавноста, ниту за политичките опоненти, бидејќи ако ситуацијата е обратна, ако не остваруваат контакти надвор од државата, тогаш ги критикуваме дека како држава сме изолирани. Она што е спорно е што нивните кабинети функционираат без координација, па неколку пати досега се случило во исто време да бидат отсутни од Македонија.

Плодна „надворешна“ соработка оваа недела ќе имаат и неколку министри кои исто така имаат ангажмани надвор од државата. Шефот на дипломатијата Никола Поповски вчера беше во Брисел - Белгија, каде учествуваше на состанок на НАТО, а министерката за внатрешни работи Гордана Јанкулоска е на дводневна безбедносна конференција во Варшава - Полска.

Покрај претседателот Вељаноски засилена дипломатска активност имаат и пратениците. Голема делегација од 11 пратеници предводи потпретседателката на Собранието Сузана Салиу, кои на покана на Европскиот центар за безбедносни студии „Џорџ Ц. Маршал“, а во соработка со амбасадата на САД ќе учествуваат на Семинарот за национална безбедносна политика во Гармиш-Партнекирхен, Германија. Семинарот што почна вчера ќе заврши на 26 април.

Истовремено делегација на македонското Собрание составена од пратениците Александар Николоски, Ермира Мехмети-Деваја и Имер Алиу учествуваат на редовната пролетна сесија на Парламентарното собрание на Советот на Европа во Стразбур, Франција.

Веќе два дена, делегација на Комитетот за односи меѓ�� заедниците составена од пратениците Ѓорѓи Коџабашиев, Оливер Спасовски, Џеват Адеми и Кенан Хасипи, се наоѓаат на студиска посета на парламентите на Унгарија и Словачка, која ќе заврши утре. Оваа посета, според информациите од Собранието е дел од соработката со УНДП.

На најмалку атрактивна дестинација Бечиќи, Црна Гора од денеска до петок се наоѓа претседателот на собраниската Комисија за транспорт врски и екологија Реџаиљ Исмаили, кој на покана од Националниот демократски институт (НДИ), ќе учествува на Работилница на тема: Надминување на предизвиците за надзор кој го вршат парламентарните комисии.