Првиот струмичанец влезе во Собрание

„Изјавата на Зоран Заев е страшна и ги демотивира луѓето што немаат партиска книшка ниту од ВМРО-ДПМНЕ ниту од СДСМ“, истакна вчера Андреј Жерновски од ЛДП во собраниската дебата за новините во Законот за организација и работа на органите на државната управа. Провокативната изјава на градоначалникот на Струмица и потпретседател на СДСМ, Заев, во врска со вработувањата во јавната администрација отвори дебата во парламентот. Надица Танчева-Тулиева од ВМРО-ДПМНЕ побара од пратениците на СДСМ да се оградат од изјавата на Заев и да почнат „демократски да се однесуваат“. Цветанка Иванова од СДСМ, пак, предупреди дека со влегувањето на законот во сила вработените во јавната администрација ќе видат што покривал, всушност, ВМРО-ДПМНЕ.

„Партизацијата на администрацијата во последниве четири години достигна невидени размери“, рече социјалдемократот Владо Бучковски. Тој нагласи дека кога ќе дојде до промена на власта, СДСМ ќе ја скрати администрацијата, но не со сите што се примени, туку само со оние што се примени спротивно на законот, кои се почетници, кои не завршиле факултет, а се на раководни позиции и немаат никакво искуство. (Д.Р.)