Прашањето за името е непотребен проблем

Никола Груевски во Стразбур повтори дека Грција е главен кочничар на македонските перспективи

Од нашиот дописник
Тони Гламчевски


Стразбур - Прашањето за името е непотребен проблем во средиштето на Европа, смета претседателот на Парламентарното собрание на Советот на Европа, Мевлут Чавашоглу. Тој вели дека е неприфатливо земји и нации да бидат блокирани поради непотребни проблеми и треба што побрзо да се постигне решение. Оваа изјава тој ја даде по средбата со премиерот Никола Груевски.

Чавашоглу нагласи дека и покрај „сериозните проблеми со Турција“, во преговорите беа отворени некои поглавја, други беа тргнати настрана, но, сепак, преговорите течат. „Ова може да се случи и со македонската кандидатура. Преговорите треба да почнат и се надевам дека проблемот со името, исто така, ќе биде решен во блиска иднина. Што се однесува на европската интеграција, немаме време за губење“, истакна Чавашоглу.

Овие зборови на големиот пријател на Македонија во Советот на Европа сигурно му се допаднаа на премиерот Груевски. Но, и самиот Груевски на крај од своето обраќање во паневропската асамблеја рече дека секоја поддршка од СЕ, иако проблемот се решава под закрила на ОН, е добредојдена.

Во своето обраќање пред Стразбур Груевски се осврна на значењето и на приоритетите на македонското претседателство. Притоа ги охрабри другите земји-членки на СЕ да го следат примерот на Македонија и ако ја немаат ратификувано Рамковната конвенција за заштита на националните малцинства, тоа да го направат без одложување.

Според Груевски, членството во ЕУ и во НАТО е врвен приоритет на македонската надворешна политика и наидува на огромна поддршка и одобрување кај повеќе од 80 проценти од граѓаните на земјата. Во таа пригода тој потсети дека иако земјата ги исполни сите неопходни критериуми и доби препорака за почеток на преговори, Советот на ЕУ поради спротивставувањето на Грција не ја прифати препораката на Комисијата, со што македонската перспектива повторно беше попречена. Тој нагласи дека во Македонија постои цврста определба за надминување на овој спор, според принципите на кои е втемелен Советот на Европа.

На прашањето на Андреј Жерновски, од име на групата европски либерали, која е македонска црвена линија во преговорите со Грција, бидејќи грчката црвена линија и таа на Папандреу е добро позната, Груевски одговори дека ако некој сака да најде решение на еден проблем не е добро да истакнува непреминливи црвени линии. Грција, според него, постојано го прави тоа со што им штети на напорите, кои ги правиме за решение на проблемот. Повторувајќи дека треба да се почитува правото на секоја земја да го избере името што го сака, Груевски нагласи дека треба да се најде решение, не само прифатливо за двете страни, туку и за нашите граѓани, бидејќи тој има политичка одговорност и за граѓаните на Македонија. „Ако најдеме решение ние ќе треба да организираме референдум, кој ќе им дозволи на граѓаните на Македонија да кажат дали го прифаќаат или не“, рече тој.

На обвинувањето на грчката парламентарка, Елза Папдимитриу, дека Груевски директно или индиректно ги поддржува иредентистичките однесувања, како фотографирањата пред картата на голема Македонија (пред гробот на Гоце Делчев) на која Солун е во Македонија, премиерот одговори оти овие карти биле на манифестација на која тој бил поканет и оти тоа не треба да се поврзува со неговата визија и со напорите за наоѓање решение за проблемот со името.

Груевски го прашуваа и за начинот на кој мисли да се справи со големата сиромаштија и со невработеноста во земјата, а тој одговори дека политиката што ја води Владата на економски план во период на светска криза е ефикасна и вродува со плод, за што се добиени пофалби од повеќе меѓународни институции.

Груевски во Стразбур имаше средба со комесарот за човекови права на СЕ, Томас Хамарберг, и претседателот на Европскиот суд за човекови права, Жан-Пол Коста.