ДПА: Соработниците на тајните служби се џелати на Албанците

ТЕТОВО - Во Демократската партија на Албанците добро им биле познати лицата што соработувале со тајните служби, а кои носат псевдоними „Ибар“ „Мама“, „Стрелец“, „Вујко“, „13 страници“. За нив се вели дека тоа е група отпадници на организацијата „Марксисти-ленинисти“, соработници на ДБК на Македонија.

„Тие се синхронизирани и добро координирани во одбрана на предавството, во одбрана на срамот и криминалот што го направиле соработниците на СДБ на Југославија и подоцна на Србија. Жално е што овие џелати на Албанците зад себе оставија гробови и болки, затвори и тортури и на секој начин се обидуваат да останат на политичката сцена“, го пренесе ставот на ДПА Имер Алиу, член на Претседателството и координатор на пратеничката група.

На вчерашната средба со новинарите Алиу рече дека „Робертсон и Солана во 2001 година ги нарекле криминалци и крадци, злосторници и сатрапи. Злото не застанува зад ова. Тие биле предавници и џелати на својот народ, убивајќи го и ограбувајќи го со обид да им се затвори иднината на Албанците во Македонија засекогаш“. Според функционерот на ДПА, оваа партија дава отпор и дејствува во заштита на Албанците не само од веќе спомнатите, туку и од кои било други. (Г.Е.)