Далас ја запре победничката серија на Њу Орлеанс

Ставен е крај на победничката низа на кошаркарите на Њу Орлеанс. Тоа го стори тимот на Далас што со 98:95 им го нанесе првиот пораз на хорнетси во новата сезона.

На 7:44 минути до крајот Њу Орлеанс имаше плус 10 (87:77), но следуваше пресврт. Во последните 200 секунди резултатот беше израмнет, па до последниот звук на сирената се водеше голема борба. Џејсон Тери погоди за водство на маверикси (97:95) на 34,9 секунди до крајот, во последниот напад Дејвид Вест промаши еднаш, а Тревор Ариза два пати за хорнетси. Победата на Далас ја потврди Дирк Новицки од линијата за слободни фрлања на 2,8 секунди до истекот на регуларното време. Токму германскиот интернационалец беше најзаслужен за седмиот сезонски триумф на Далас. Оствари ефект од 25 коша, 10 скока и три асистенции, лидер на Њу Орлеанс беше Крис Пол со 22 поена, четири скока и три додавања.

Моментно втората екипа во источната конфере��ција, Орландо, ја забележа седмата победа сезонава. „Магичните“ го совладаа Мемфис со 89:72 во меч во кој доминираа од почеток до крај против неубедливите гризли. Најрасположен за игра кај Орландо беше Двајт Хауард со 18 поени и 14 скока, прво име кај Мемфис беше Марк Гасол со 14 коша, осум скока и две асистенции.

Резултати: Орландо - Мемфис 89:72, Шарлот - Минесота 113:110, Далас - Њу Орлеанс 98:95, Феникс - Денвер 100:94, Јута - Оклахома 108:115, Голден Стејт - Детроит 101:97, Лос Анџелес Клиперс - Њу Џерси 96:110.