Атина навредена од изјавите на бугарскиот претседател

Пред средбата во Њујорк идната недела, Атина и натаму очекува промена на ставот само кај Македонија

Од нашиот дописник
Миркица Поповиќ

Атина - Грција чека промена на ставовите на македонска страна за на претстојната средба со медијаторот Метју Нимиц да дојде до напредок во преговорите за спорот за името. Една недела пред новата рунда средби во Њујорк на медијаторот со преговарачите Зоран Јолевски и Адамантиос Василакис јасно се гледаат притисоци од сите страни, но и молк околу последната рамка предлози.

Од грчкото Министерство за надворешни работи инсистираат дека преговарачката процедура е јасно определена, дека се одвива во Обединетите нации и нема никаква врска со Европската унија и со пристапниот процес на Македонија. Среде интензивирањето на преговорите, Атина остана изненадена и од изјавите на бугарскиот претседател Росен Плевнелиев дека „Бугарија не е втора Грција“ и дека не започнала „војна“ против Македонија, демантирајќи категорично дека тие како сосед и' се закануваат на нашата држава и дека спротивно на тоа, работат на поттикнување на нејзината евроинтеграција.

Во Атина остануваат на ставот дека, во принцип, не се против предлогот на еврокомесарот за проширување, Штефан Филе, за трилатерална средба, меѓутоа очекуваат доколку дојде до неа, таа да биде добро подготвена и да донесе суштински резултати, а не само фотографии за медиумите. Портпаролот на грчкото МНР, Григорис Делавекурас, изјави дека се посветени на преговарачкиот процес и токму затоа сакаат по секоја македонско-грчка средба да има суштински резултати. Во врска со шпекулациите дека е можна билатерална средба на министерот Димитрис Аврамопулос со Филе, Делавекурас потенцираше дека моментно на распоредот нема такво нешто, иако од Брисел потврдија дека еврокомесарот ќе присуствува и ќе се обрати на истиот министерски состанок на ЕУ на 31 јануари, па средбата не можат да ја исклучат.

Во новинарски кругови се шушка дека не е исклучено еврокомесарот во наредниот период повторно да намине до Атина за да разговара за нивниот предлог-меморандум за соработка. Од Министерството минатата недела информираа дека Филе во писмото до Аврамопулос потенцирал да дојде до трилатерална средба за да се дискутира грчкиот меморандум за соработка. За Грција меморандумот останува иницијатива, чекор за да се постигне напредок во спорот за името. „Задоволни сме што преку меморандумот дојде до интензивирање на преговорите во Обединетите нации. Она што треба да се случи сега е двете страни да соработуваат активно и конструктивно и што е најважно да има политичка волја за да тргнеме напред. Тоа го очекуваме“, истакна Делавекурас.

Грција бара македонската Влада да демонстрира политичка волја и на преговарачката маса кај Нимиц да покаже дека може и сака решение. Се' уште се повторуваат забелешките дека македонската Влада продолжува со систематската негативна пропаганда против Грција. За грчкото МНР ваквата тактика е показател дека македонската Влада наместо да се фокусира на решавање на името, бара начин да го заобиколи наоѓањето конечно решение.

„Претседателот на Бугарија ги измешал работите, затоа што Грција сигурно не е држава која и' се заканува на Македонија“, беше реакцијата на Делавекурас околу изјавите на Плевнелиев. Тој додаде дека Грција работи постојано за Македонија да може да чекори напред кон ЕУ и да се интегрира во европското семејство. „Затоа, треба да сме многу внимателни во коментарите што ги даваме“, предупреди тој . Оваа „сопка“ во грчко-бугарските односи доаѓа во период кога аналитичарите во Грција коментираат дека со тоа што добрососедските односи на Македонија кон Бугарија се вклучени во заклучоците на Советот на министри на ЕУ, само се потврдуваат грчките тези дека нашата држава треба да работи на подобрување на односите со нејзините соседи.

Делавекурас изрази надеж за брзо решавање на политичката криза во Македонија, со порака дека единствен начин за излез од неа е дијалогот. Според него, Грција сака во своето соседство да има држава каде што ќе има развој и напредок и ќе се спроведуваат европските стандарди.

Како што информираа од Министерството, новиот шеф на грчката канцеларија за врски, Теохарис Лалакос, е веќе во Скопје и ја презел функцијата која досега ја извршуваше Александра Пападопулу. Лалакос доаѓа од амб��садата во Анкара каде што досега беше вршител на должноста. Во Грција се смета за искусен и способен раководител и дипломат, особено затоа што бил втор човек во Анкара, која е една од најприоритетните амбасади на Грција. Пред службата во Турција, Лалакос бил и генерален конзул во грчкиот конзулат во Александрија.