Субр��та Рој ќе го светне охридскиот бисер

Индискиот милјардер најави дека откако ќе се комплетира градежната документација ќе почне изградбата на туристички комплекс во Љубаниште

Од нашиот известувач
Маја Томиќ

Охрид - Индискиот милијардер Субрата Рој, кој стаса трет пат во Македонија, го најави големиот и амбициозен проект за суперлуксузниот туристички комплекс што ќе се гради во автокампот Љубаниште од „Сахарија груп“.

Комплексот лоциран на крајбрежјето на Охридско Езеро на површина од 240 хектари ќе располага со суперлуксузни хотели, казина, вили, бунгалови, голф- терени и други објекти за рекреација, спа-центри, марина-хотели, објекти за забава, казино на вода ....

„Овој проект е едно големо емотивно патување. Ние сме многу среќни што сме овде“, со овие зборови ја почна вчерашната прес-конференција во Охрид, Субрата Рој, додавајќи уште еднаш дека е одушевен од македонската љубезност. Не можеше да прецизира кога точно ќе почне изградбата на овој туристички комплекс, ниту да ја каже точната сума колку ќе вреди, само нагласи дека веројатно ќе чини неколку стотици милиони долари и дека е потребно да се завршат уште многу работи затоа што станува збор за комплексен проект. Рој навести дека за да почне изградбата на комплексот ќе треба прво да се комплетира градежната документација. „Целиот проект пред се' е инициран од аспект на бизнис. Нашите заложби не се тоа да биде некој просечен туристички комплекс, туку една дестинација меѓу најдобрите пет до десет од таа област од целиот свет“, истакна Рој. Тој потенцира дека неговата компанија се' што прави, прави големо, а таков ќе биде и овој амбициозен проект од кој, според Рој, ќе имаат полза и двете страни, и Македонија и „Сахарија груп“.

„Никој на светот не може да предвиди каков ќе биде конечниот изглед на проектот. Не сме тука да правиме нешто просечно. Зошто некој би доаѓал тука? Затоа тоа мора да биде нешто од врвна класа, нешто меѓу петте, максимално десетте најдобри дестинации во светот“, истакна Рој.

За него климата игра мошне важна улога во вакви проекти. И затоа по посетата минатото лето, сакал да види каков е Охрид во зима.

Тој истакна дека кога се работи за бизнис од туризмот, мора да се води сметка и за климата. Рој потенцира дека уште при првата посета ја засакал нашата земја, убавини и луѓето.

„Не можам со зборови да објаснам, дури Охрид како да бил дел од мојот претходен живот. Токму тогаш почнаа нашите планови“, додаде Рој.

Вицепремиерот и министер за финансии Зоран Ставрески, кој е домаќин на индискиот милијардер, истакна дека веќе е формирана група од 25 лица кои ќе работат во сите фази на проектот. Ќе се работи на финансискиот дел, инфраструктурата, маркетингот и еколошките стандарди.

„Максимално ќе бидат запазени еколошките стандарди за да се заштити Охридско Езеро. Ќе се формира и туристичка развојна зона во Љубаниште, а граѓаните ќе бидат обесштетени за земјиштето. Имаме договор со ’Сахара’ дека сите тие стандарди ќе бидат максимално почитувани, со цел проектот да биде и транспарентно подготвен, но и да одговори на сите стандарди за заштита на Охридско Езеро“, нагласи Ставрески.

Според него, инвестицијата е од големо значење за македонската економија, која Охрид ќе го направи туристички активен 365 дена во годината, а ќе отвори и илјадници нови вработувања во малото стопанство. Ставрески најави дека Владата ќе почне со инфраструктурните подготовки, кои опфаќаат изградба на нов пат од Охрид до албанската граница и автопат од Скопје до Охрид. Инвестицијата за него е поттик за Владата да продолжи со привлекување странски инвестиции.

Субрата Рој порача дека овој комплекс ќе привлекува милиони туристи, најмногу од Европа, Русија и Кина со што Македонија ќе стане светска туристичка дестинација. Индискиот милијардер не откри повеќе детали за другите проекти во Македонија, иако се најавува сличен комплекс и во Преспа, а интерес има и за вложувања во земјоделскиот сектор. Но, за нив не стана збор на вчерашната прес-конференција, која беше исклучиво наменета за проектот во Охрид.

Синот на Рој ја купи „Славија“ за 5 милиони евра

Индискиот бизнисмен Субрата Рој го купил хотелот „Славија“ во Охрид за околу 5 милиони евра, а зделката била реализирана веднаш по неговото пристигнување во Охрид. Рој не ја откри сумата што ја платил за хотелот, со образложение дека неговиот син преговарал за купување на хотелот. „Син ми се пазареше, а плати колку што требаше“, изјави вчера кусо индискиот бизнисмен.

Дека е продадена „Славија“ претходно потврди сопственикот на хотелот Владо Рувинов. Се претпоставува дека Рој го купил хотелот за во него да ги смести архитектите и инженерите кои веќе за половина месец треба да дојдат во Охрид за да ги почнат подготовките за реализација на проектот „Сахаријан Македонија“. (М.Т.)