Груевски испука торпедо кон Брисел

„На Грција и' играат ’пиперевка’, а нам ни покажуваат колку се моќни“, вели премиерот во интервју за МИА

Светлана Унковска


Премиерот Никола Груевски, во интервју за државната агенција МИА, повторно жестоко ја нападна м��ѓународната зедница дека и' врши притисок на Македонија за решавање на спорот со името и за тоа, како што вели, користела смислена тактика преку забелешките дека недоволно ги спроведуваме реформите и дека со пренагласување на слабостите имале за цел да не' доведат во непријатна ситуација. Според Груевски, меѓународната заедница со вакви критики сакала да не' девалвира пред јавноста, бидејќи не можеле да влијаат врз Грција, пред која, како што вели тој, „играле пиперевка“.

Со ваков тон и со сличен вокабулар Груевски настапи и при објавувањето на Извештајот за напредокот на земјава од Европската комисија минатата недела, и тоа пред директорката за проширување на ЕК, Александра Кас Грање, со која одржаа заедничка прес-конференција.

„Тие веруваат дека ако јас и Владата прифатиме некоја од грчките варијанти за решение за името, тогаш се решава проблемот, поточно дека нашата поддршка ќе значи успешен референдум. Тоа е голема грешка и како резултат на тоа грешно верување нивната тактика е да вршат притисок врз Владата и врз мене како премиер, во правец дека недоволно правиме за реформите. Оваа тактика ни беше најавувана индиректно, а некогаш и директно и не е важно кој ја смислил, дали поединци во Брисел или подалеку, сепак, резултатите ги гледаме, таа се спроведува“, вели Груевски.

Според него, Брисел спроведувал сосема погрешна тактика, која предизвикувала обратен ефект и која ги оддалечува двете земји од решението.

„Со оглед дека таа веќе се спроведува, немам избор освен да се справувам со неа. Ова прашање не се решава со сила, особено не на ваков начин, кога целиот притисок се става на едната страна, а врз другиот речиси и да нема притисок. Нашиот народ вели ’не можат по атот, па по самарот’“, вели Груевски. И покрај ваквите ставови, тој реторички повторува дека и натаму останува на истите приоритети за членство во НАТО и ЕУ и дека е тоа наш стратешки интерес.

Само неколку дена откако го прими последниот Извештај на ЕК, Груевски самиот најавува дека в година е можно и повлекување на препораката. Според него, Брисел намерно посилно ја критикувал земјава се' со цел да се најави дека следната година ќе останеме и без препораката бидејќи Комисијата била доведена во непријатна ситуација, затоа што три години стоиме во место.

„Тие бараат излез, а еден од излезите е да не' прогласат за неспособни и да ја повлечат препораката и да си ја подобрат сопствената комоција. За такво нешто потребно им е годинава, како позитивна, сепак, да ни ја намалат оценката, за да подготват терен за следната година“, смета Груевски, кој додава дека дополнителен проблем им било тоа што сега ЕУ форсирала други земји со кои требале да почнат преговори и дека за нас им било потребно оправдување зошто се' уште не сме дел од Унијата.

Тој го оцени комесарот Штефан Фуле како искусен дипломат кој не зборувал директно, но дека тој, пак, научил да ги чита пораките искажани со јазикот на дипломатијата. Груевски, вели дека меѓународната заедница, всушност, покажувала мускули и не' казнувала како послаба страна за разлика од Грција.

„На Грција и' играат ’пиперевка’, заради Грција низ Европа паѓаат влади, а нормално кога не можат на Грција нам ни покажуваат колку се моќни. Тоа е“, одговара Груевски.

Забелешките од меѓународната заедница, премиерот ги гледа уште и како одење на рака на опозицијата, која ја нарече екипа со старо водство, безидејност и пристап дека друг ќе им ја одработи победата. Без критика, секако, не поминаа и невладините организации, граѓанскиот сектор и медиумите. На новинарско прашање или повеќе констатацијата дека треба да се очекува ваков вид пренагласено истакнување на слабостите од повеќе страни, Груевски вели дека нив ги има од многу страни.

„Разни меѓународни НВО, здруженија, институции, политичари, експерти... ќе добијат поддршка и од некои медиуми, веројатно. Целта е јасна, притисок за решение на спорот по секоја цена“, вели Груевски, кој го цитира и Балашевиќ, дека се' било во стилот „принципот е ист, се' останато се нијанси“. (Св.У.)

За што Груевски ги обвини Филе и ЕУ

п Вршење притисок врз македонската Влада

п Вршење притисок врз Груевски како премиер

п Намерно девалвирање на Груевски

п Закани дека ќе вршат негово компромитирање

п Обвини и дека само македонската страна е под притисок, а не и грчката

п Барање решение за името по секоја цена

п Манипулации со соопштенијата кои ги издава по средбите со државниот врв

п Нанесување неправди на Македон��ја во последните 20 години

п Дека за меѓународната заедница Македонија е несакано дете

п Намерно потценување на достигнувањата на Македонија во последната година

п Режирање ситуација за одземање на препораката идната година

п Фаворизирање на Грција за миленик на Европа, а потценување на Македонија

п Намерно посочување на Македонија како неспособна со цел Брисел да си најде алиби за неуспехот со името и да си ја чува сопствената комоција

п Фаворизирање на Хрватска, Србија и Црна Гора, а намерно отфрлање на Македонија со изговор дека има застој во реформите и не е решено името