Претходен број

Во Владата врие, Груевски на потег

Причините за оставката како најстрого чувана тајна

Соња Крамарска

Што сакаше вицепремиерот Ивица Боцевски да каже со прошталното писмо во кое е клучна реченицата „мојот придонес во Владата е исцрпен“? Тоа е прашањето што и вчера најмногу се поставуваше во политичките кругови откако завчера, на сензационален начин, беше соопштено дека столбот на владината пропаганда против политичките непријатели и, нејзината врска со Брисел, Боцевски, заминува од функцијата.

Боцевски и вчера беше недостапен за какви било дополнителни коментари, а како по договор молчи и премиерот, кому ненадејно му се разбранува кабинетот, исфрлајќи на површина две мошне важни имиња на уште поважни министе��ски ресори: Секторот за евроинтеграции и Боцевски и Министерството за правда на чело со Михајло Маневски, за кого минатата седмица експремиерот Владо Бучковски поднесе докази дека примал и плата и пензија.

Што сега го очекува премиерот Никола Груевски?

Дали реконструкција на владиниот тим или, пак, само замена на двајцата министри, од кои едниот нема намера сам да се повлече, иако неговиот етички и морален кредибилитет е целосно уништен. Груевски, во досегашното близу тригодишно владеење, е познат како политичар кој избегнува да прави персонални измени во владиниот состав, освен кога на тоа е принуден. Но, сега, кога настапи своевидна политичка криза дополнета и со постојаните барања на коалициониот партнер ДУИ за реконструкција, амбиентот е поинаков.

За само една седмица по скандалозното откритие дека министерот за правда Михајло Маневски земал и плата и пензија, климата во Владата доживеа бурен пресврт. Она што подолго време се шпекулираше - дека вицепремиерот Ивица Боцевски ги пакува куферите, експлодира токму во моментите кога премиерот Никола Груевски се мислеше како да ја извлече Владата од аферата со министерот Маневски. По повлекувањето на Боцевски, кое се' уште е мистериозно, станува јасно дека владиниот кабинет преживува турбулентен период или на мала врата се вовлекува политичка криза, чии корени се' уште не можат да се објаснат.

Владата и вчера остана затворена за подетаљни информации за оставката на Боцевски, иако политичката култура и етика налагаат вицепремиерот или Владата да и' ја кажат на јавноста причината за повлекувањето. Единствено министерот за финансии Трајко Славески кој, според новинарските перцепции, подолго време се наоѓа на топ-листата за реконструкција, даде изјава во која демантира дека ќе биде сменет.

„Јас се' уште сметам дека не сум исцрпен и оти можам уште многу да придонесам“, изјави министерот Славески. Тој рече дека „одредени кругови“ заговараат негова смена уште од септември 2006 година, со цел да ја ослабнат позицијата министер на финансии. „Настојувам тоа да го надоместам со други перформанси“, одговори Славески на новинарските провокации.

Груевски, кој за момент се повлече од јавноста за мирно да размисли што да прави понатаму, се' уште не се изјаснува околу предлозите за реконструкција. Но, јасно е дека со министри со нарушен етички и морален кредибилитет, како што е министерот за правда Михајло Маневски, или министерот за образование, Перо Стојановски, кому Уставниот суд му направи повеќе интервенции во правилата што ги воведе, и без министер во клучната сфера -евроинтеграции, Груевски ќе мора да повлече неколку брзи потези за да ја стабилизира Владата.

Останува нејасно што мислат Владата и владејачката ВМРО-ДПМНЕ со нивната констатација дека со Боцевски ќе соработуваат и понатаму на различни ниво. Но, едно е сигурно, а тоа е дека со реченицата „мојот придонес во Владата е исцрпен“, која недвосмислено е исполнета со иронија и цинизам, Боцевски дава индикатор дека, сепак, се работи за конфликт кој довел до негово напуштање на Владата.

Една од можните причини за оставката, како што дознавме вчера, биле нарушените односи на Боцевски со државниот секретар во Секторот за евроинтеграции, Перо Димшоски, кого Груевски го назначи да раководи со евроинтеграциите до именувањето на нов вицепремиер. Според наши информации, Боцевски и Димшоски веќе подолго време не разговарале, а во овој конфликт премиерот Груевски бил на страна на Димшоски. Груевски, пак, од своја страна бил разочаран што Боцевски со него зборува едно, а пред странците, кога давал оцени за Владата и за перспективите на Македонија, наводно, зборувал со друг тон, кој бил критички во однос на политиката на премиерот.

Иако премиерот Груевски се обидува во јавноста да наметне атмосфера дека се' е во најдобар ред и оти Владата функционира, всушност, јасно е дека последнава седмица во „царството“ повеќе не владее мир. Јавноста бара одговори и дискретно се обидува да го потсети Груевски дека на располагање му стои инструментот „реконструкција на влада“, но изгледа дека тој се' уште не е подготвен да го прифати предизвикот.

За реконструкција притиска и Демократската унија за интеграција (ДУИ), од каде што потекнуваат сите медиумски шпекулации во текот на изминативе две седмици дека Груевски ќе прави персонални измени во составот на неговиот кабинет. Тие, пак, си имаа свои математики, кои се на сцена уште од локалните избори, на кои ДУИ не го повтори успехот од досегашните избори и ја вознемири партиската база која бара персонални смени во извршната власт.

Секако ќе биде интересно да се види кој ќе биде наследникот на Ивица Боцевски во Секторот за евроинтеграции. Од неколку важни места поврзани со Брисел вчера пристигнаа сугестии премиерот што поскоро да назначи нов министер за евроинтеграции и Владата што побрзо да се одлепи од епизодата со Боцевски.