Македонско добредојде за Eмирот од Катар

Ова е прва официјална посета на еден крал од арапскиот свет од независноста на Република Македонија

Македонија денес и утре ќе живее во знакот на Катар. Доаѓањето на владетелот на една од најбогатите земји во светот Катар,емирот Хамад бил Халифа ал-Тани, познат како Шеик Хамад и неговата огромна свита, ќе биде одбележано со по��ебен режим на сообраќај, како и со стотина знамиња од двете земји по улиците на главниот град.

Ден пред посетата, по скопските улици можеа да се видат полициски возила и мотоцикли како ги вежбаат последните детали од предвидената маршрута поврзана со дводневната посета на високиот гостин од Арапскиот свет.

Домаќин на делегацијата од стотина луѓе, меѓу кои и двајца членови на кралското семејство, 12 министри, бизнисмени, новинари, ќе биде шефот на државата Ѓорге Иванов. Македонскиот претседател по трет пат се среќава со сувереност на Катар, но овој пат на домашен терен. Познанството датира од 2009 година во Њујорк за време на 64. Генерално собрание на Обединетите нации, а нивната втора средба се одржа во 2010 година во Катар за време на Десеттиот Доха форум. Оваа земја во 2003 година финансиски и политички го поддржа одржувањето на Самитот на шефови на држави од ЈИЕ на тема „Дијалог меѓу цивилизации“, чијшто иницијатор беше починатиот македонски претседател Борис Трајковски. Во 2013 година, на десетгодишнината на Самитот, Македонија повторно ќе биде домаќин на овој форум.

Педесетидеветгодишниот емир на Катар, на скопскиот аеродром „Александар Велики“ пристига со авионот ЕРБАС 340 и ќе биде пречекан од претседателот Иванов, со највисоки воени и државни почести. Од таму со блиндирано возило, придружувано со седум полициски мотоцикли, ќе се упати во вилата „Водно“, каде што ќе одржат тет-а-тет средби со претседателот Иванов.

Емирот на Катар ќе допатува во одело, а на свечената вечера во хотелот „Александар палас“ ќе биде облечен во традиционална облека извезена со златен конец. На приемот ќе присуствуваат околу 90 луѓе од двете делегации. Во духот на нивната религија, нема да се служи алкохол, а храната ќе биде традиционална македонска со јагнешко и со телешко месо, бидејќи, по нивно барање, на вечерата нема да има јадења со свинско месо. На вечерата ќе настапат Културно-уметничкото друштво „Танец“ и оркестарот „Чалгии“ на Македонската радио-телевизија. За спомен од Македонија, емирот ќе добие резба „Македонска носија“.

Ова е прва официјална посета на еден крал од арапскиот свет од независноста на Република Македонија. Својата европска турнеја емирот на Катар ја почнува од Македонија, по што следат посетите на Албанија, Полска и Украина.

На вториот ден од посетата, емирот ќе се сретне со премиерот Никола Груевски и со претседателот на Собранието Трајко Вељаноски, по што е предвидено разгледување на културно-историски знаменитости и посета на Старата скопска чаршија.

Катар е држава во Југозападна Азија, која се наоѓа на полуостровот Катар. Главен град е Доха. Го опфаќа малиот полуостров на западниот брег на Персискиот Залив и неколку соседни островчиња. На југ се граничи со Саудиска Арабија, а на запад по море се граничи со Бахреин. По државно уредување е апсолутна монархија - емират, а службен назив е Држава Катар. Државата Катар брои околу 1.700.000 жители и е поранешен британски протекторат. Независна држава станува на 3 септември 1971 година.

Изобилува со минерални ресурси, нафта и е трета во светот по резерви на гас. Фактот што нејзината економија се потпира на извозот на нафта и гас, ја вбројува во редот на земјите со највисок БДП по глава на жител (46.000 долари во 2005 година).Официјален јазик е арапскиот, но во широка примена е и англискиот јазик. Речиси 95 отсто од населението се со исламска вероисповед, а останатите христијани, Евреи, Индуси..

Република Македонија беше меѓу првите земји од регионот која во 2005 година отвори дипломатско-конзуларно претставништво во Доха, од каде што се планира да бидат дипломатски покриени уште неколку земји од тој регион.

Од Кабинетот на Иванов посочија дека има интерес за отворање амбасада на Катар во Република Македонија. Досега амбасадата на Катар со седиште во Рим ги покриваше дипломатско-конзуларните работи за Македонија. Оттаму, информираа и дека оваа посета е многу значајна затоа што е продолжение на континуираниот политички дијалог и ќе претставува силен сигнал за интензивирање на севкупната соработка. посебно на економската.

На средбата на македонскиот претседател со емирот на Катар ќе бидат разгледани билатералните односи меѓу двете држави и ќе бидат разменети мислења за ситуациите во регионот, на Блискиот Исток и Северна Африка, како и на Балканот. Посебен акцент ќе биде ставен на развојот и унапредувањето на економските односи меѓу двете држави, односно зголемување на трговската размена, како и можноста за директни катарски инвес��иции во македонското стопанство.

Во рамки на посетата на емирот на Катар ќе бидат потпишани неколку билатерални договори од областа на културата, образованието, здравството, како и од економската сфера.

Кој е емирот на Катар?