Бензинот зароби илјадници Македонци во Грција

Граѓаните што заминуваат на одмор подобро да ги
наполнат резервоарите

Миркица Поповиќ

Сопствениците на возила во Грција се во бессознание. Речиси 80 отсто од бензинските пумпи во цела држава пресушија, а кај оние што се' уште имаат резерви гориво се чека со часови. Цените на горивата остануваат превисоки, како и претходно, а се движат од 1.50 до 1.70 евра за литар.

Грчките медиуми пренесуваат дека просечно осум од десет бензински пумпи веќе немаат гориво, што е случај низ цела држава. Во Солун од 450 бензински пумпи 70 отсто се веќе затворени, а тоа се случува и со 1.300 бензински во Атина и околината. Хаос владее и на малкуте бензински пумпи на Халкидики и на островите, кои покрај локалното население во овој период ги услужуваат и бројните туристи.

Покрај финансиските проблеми, недостатокот од гориво не е добра вест ниту за оние што одморот го почнуваат овој викенд. Кризата со нафта во Грција почна да создава паника и кај македонските граѓани, кои се на одмор во оваа земја, а планирале да се вратат од одмор до крајот на оваа недела. Неколкумина од нив, кои се наоѓаат на Халкидики и на подалечните острови, како што се Лефкада и Крф, се јавија во Редакцијата на „Утрински весник“ загрижени поради тоа што имаат гориво само за стотина километри и не можат да купат на ниедна бензинска, иако веќе им завршува договорениот аранжман за одмор и треба да се вратат дома.

Во туристичките агенции во Скопје велат дека од медиумите слушнале за нафтената криза и ги предупредуваат своите коминтенти, кои договараат туристички аранжмани, да го наполнат резервоарот со бензин пред да поминат граница. Но, кај нив вчера се' уште немаше повици и реакции од граѓаните кои користат нивни аранжмани, а патувале со сопствен превоз. Велат дека во случај ако не се реши кризата со горивото и има реакции од граѓаните, секако, ќе најдат начин да им излезат во пресрет за полесно да се реши проблемот.

Во незавидна состојба може да бидат и македонските транспортери, кои од неодамна почнаа да ги следат и ограничувањата од Грција за количеството гориво што камионите и автобусите може да го поседуваат при влез во земјата. Камионите и автобусите кои влегуваат во Грција смеат да имаат само 200 литри гориво во резервоарите, додека ограничувањето за камиони со ладилници е 300 литри гориво, место 500-1.200 литри, како што е вообичаено. За секој литар над дозволеното ќе мора да се плаќаат дополнителни давачки од половина евро. На овој начин транспортерите беа принудени да полнат гориво по повисоки цени во Грција, а сега поради недостатокот не е исклучена можноста и транспортерите да останат на половина пат без гориво.

Кризата со горивото почна уште од неделата, кога сопствениците на камиони и цистерни одлучија да почнат штрајк против предлог-законот за либерализирање на пазарот, со што отсега секој ќе може за ниска цена да извади дозвола за превозник, за која минатите години скапо плаќале. Превозниците и сопствениците на камиони и на цистерни сметаат дека со ова се обесправени и финансиски повредени, бидејќи сега може да изгубат и дел од работата од некој што за дозволата ќе плати само околу пет евра.

Најавија дека штрајкот ќе трае неопределено време, се' додека владата не им понуди прифатлива понуда. Штрајкувачите го блокираа пренесувањето на гориво и блокираа една лента од автопатиштата низ одредени делови од Грција. Од неделата, кога почна штрајкот, пропуштаат само по една или две цистерни на нафтените компании за да се спроведе до болниците, додека останатите приватни цистерни на компаниите се заглавени и не им е дозволено да поминат и да пренесат гориво до бензинските. Многумина вработени на бензинските во Атина велат дека ако во сегашниот хаос и се пропуштат неколку цистерни, тие нема да бидат доволни за потребите на пазарот. Во Солун, пак, работите се малку поумерени.

Се очекува состојбите да се влошат во следните денови доколку штрајкувачите не решат да „пуштат срце“ и да го отворат патот за приватните цистерни. Постои и можност да настане недостиг од производи на пазарот, бидејќи е нарушено нормалното пополнување на продавниците поради протестите на сопствениците на камиони.

Трговците повикуваат за разум и бараат од владата и штрајкувачите преку дијалог да побараат решение за појавените проблеми. Меѓутоа, и вчера штрајкувачите категорично одбија да се откажат од своите барања и да го прекинат протестот.

Штрајкот на превозниците, заедно со оној на контролорите во понеделникот, со кој голем број туристи беа заглавени на грчките аеродроми, создаваат ужасна слика за Грција оваа туристичка сезона и може само да ги избркаат туристите, кои и така годинава се во помал број од претходните години.

Во зависност од времетраењето на протестот можно е да дојде и до недостиг од гориво за авионите и за траектите, кои пренесуваат голем број туристи од Атина до островите. (М.П.)