Министрите со празни раце во Брисел

Додека траеја кавгите во Македонија кој е крив за неусвојување на Деловникот, еврокомесарот Штефан Филе и белгискиот шеф на дипломатијата, Стивен Ванакере, ги испорачуваа забелешките на Брисел за вкупната политичка и економска состојба во земјата на состанокот на Советот за стабилизација и асоцијација.

Без деловник, без демонстрација на политички дијалог, без решение за името, без ретерирање околу антиевропскиот закон за дискриминација, со притисок врз медиумите ден пред состанокот, со аферата околу фармерот Илиевски и пораката за нефункционирањето на правната држава, како и со одбивање парламентарна контрола за трошењето на буџетските средства, состанокот беше уште една пропуштена можност за Македонија.

Изјавите од состанокот требаше да дојдат по затворањето на весникот, но главните забелешки на Брисел упатени до македонските министри Антонио Милошоски, Васко Наумовски и Абдулаќим Адеми, беа познати и пред тоа. Според нив, во Македонија има општо влошување на политичкиот дијалог, проблематична е независноста на судството каде што процедурите за избор и менување на судиите предизвикуваат се' повеќе загриженост, додека корупцијата е раширена, а борбата против неа политички пристрасна. Според заклучоците, Владата треба да го троши буџетот помудро на начин што ќе и' помогне на економијата, треба да работи натаму на професионална и одговорна администрација за да ги троши сама парите од ИПА-фондовите, треба да даде потврда дека се казнети сите што ги прекршиле законите на изборите и да ги заштити од дискриминација хомосексуалците. (Н.Р.)