Албански политичар осуден за организирање атентати во Македонија

Албански политичар е осуден на четири години затвор од белгискиот суд во Намур поради организација на атентати во Македонија и во Косово, објавија белгиските веб-страница на РТЛ инфо и Де морген.

Судот од Намур го осуди Идајет Беќири на четири години затвор во негово отсуство и издаде меѓународна потерница за негово апсење, бидејќи тој моментно живее во Албанија.

Според кратката вест на РТЛ инфо и Де морген, овој албански политичар уживал статус на политички бегалец во Белгија во периодот од 1997 до 2003 година. „Тој е основач и претседател на политичката партија ФБКСХ – националистичка партија која се залага за обединување на ’голема Албанија‘“, пишуваат белгиските медиуми.

Вооруженото крило на партијата - АКСХ ја презеде одговорноста во 2003 година за експлозијата на бомба пред судот во Струга  и на железничкиот мост во Митровица во Косово.

„Идајет Беќири од Намур планирал и организирал атентати во Македонија и во Косово“, изјави белгискиот федерален јавен обвинител Жан-Марк Триго.

Истрагата се водеше во Белгија, Намур, исто како и во Македонија и Косово. Доказите од истрагата покажале дека политичарот играл илегална и криминална улога во атентатите. „Беќири  организираше и раководеше со криминални структури од Белгија и Намур, кои имаа намера да водат насилнички акции. Овие акции сериозно ја загрозија меѓународната безбедност“, заклучи обвинителот Триго. (МИА)