Вахабизмот се шири брзо, се бара помош од ЕУ

Главна закана за стабилноста на регионот се вахабистичките групи

Мики Трајковски


ОХРИД - „Вахабизмот во земјите на Западен Балкан се шири со забрзано темпо. Вахабистичките групи се главна закана за стабилноста на регионот“, оценуваат првите луѓе на полициите во Македонија, Босна и Херцеговина, Хрватска и Црна Гора, кои во Охрид учествуваа на конференција посветена на борбата против организираниот криминал и стабилноста.

Директорот на босанската полиција, Златко Милетич, вели оти е загрижен од игнорантскиот однос на државите, но и на меѓународниот фактор од појавата на вахабизам на овие простори, нешто што може сериозно да влијае и врз стабилноста на цела Европа.

„Ова е регионален, но и европски проблем. Оваа појава се раширена во Босна и Херцеговина, но и во Србија, Санџак, Косово, а во последните неколку месеци и во Македонија. Загрижува податокот дека вахабизмот се шири и кон Хрватска и Црна Гора, затоа сите заеднички ќе мора да најдеме одговор на ова сериозно прашање“, нагласи Милетич. Според него, проблемот е сериозно потценет, особено од Европската унија, никој не зборува за превенција и за заштита. „Никој на овие простори нема проблем со исламот како религија, туку со радикалните исламистички структури. Вахабизмот ќе дојде до израз во наредниве неколку години. Во неговото спречување ќе мора да се вклучат не само полициите туку и религиските групи и организации“, нагласува директорот на босанската полиција.

Проблем за овдешните полиции е тоа што не се доволно подготвени. Станува збор за млади и недоволно искусни полициски системи на кои им е неопходна помош однадвор. „Иако овој проблем не е изразен во таа мера во Хрватска, ние ги следиме случувањата во соседството и дејствувањето на радикалните организации. Вахабизмот како појава во наредните три до четири години ќе биде главна опасност за регионот“, смета директорот на хрватската полиција, Оливер Грбич.

Претпазливост постои и во Македонија, рече директорот на Дирекцијата за јавна безбедност, Љупчо Тодоровски. „Има одредени радикални активности и кај нас, но досега не се регистрирани кривични дела од нивна страна што би ја загрозиле безбедноста на Македонија“, изјави Тодоровски. Според него, безбедонсната состојба во Македонија моментално е стабилна.

„Државната граница, особено во делот на Косово, се чува одлично. Немаме индиции дека нешто може да се случи, и покрај тоа што Косово е млада држава, а таму стабилноста е се' уште кревка. Во Косово треба да се создадат силни институции, кои ќе откриваат кривични дела што ги вршат граѓаните, но и тамошните политичари. Во делот со Бугарија и со Албанија имаме заеднички патроли и не може да дојде до дестабилизација. Доколку нешто почувствуваме, навремено ќе реагираме“, истакна Тодоровски. Директорот на Бирото за јавна безбедност, Љупчо Тодоровски, вчера го презеде претседавањето на Асоцијацијата на директорите на полициите од земјите на Југоисточна Европа, СЕПЦА. Тој вели дека негова прва задача ќе биде откривање на организирани групи на криминал што дејствуваат во целиот регион.

Поголемиот дел од земјите од Асоцијацијата имаат проблем со шверцувањето на оружјето, недозволената миграција, дрогата. Организираниот криминал нема граница, а криминалните групи во регионот одлично соработуваат, беше речено на вчерашниот форум во Охрид.