Претходен број

Ќе го прифати ли МПЦ подарокот од Владата?

Ако МПЦ сака да гради црква, тоа може да го стори на својот паркинг спроти „Холидеј ин“

Билјана Јовановска

Македонската православна црква, која на подарок од Владата го доби земјиштето на скопскиот плоштад на кое ќе може да гради храм, се' уште официјално не се изјасни дали го прифаќа и дали има пари за негова изградба. Наводно, за ова не биле претходно информирани, а став ќе заземат на наредната синодска седница.

Преспанско-пелагонискиот митрополит Петар смета дека Владата се одлучила на ваков чекор поради притисоците од јавноста дека не може да троши буџетски средства за изградба на црква, но уверен е дека МПЦ за наредните 15 години ќе успее на оваа локација да ја возобнови некогашната „Св. Константин и Елена“. Тој верува дека со донации ќе се вклучи народот, како и за сите храмови, но не ја исклучува ниту можноста во меѓувреме да се јави некој заинтересиран донатор.

За архитектот Мирослав Грчев потегот на Владата е противзаконски и противуставен, бидејќи таа нема право да подарува државно земјиште. Локација на скопскиот плоштад е земјиште за општа употреба, кое може да го користат сите граѓани во државата. Спорно е што Владата со измените во Деталниот урбанистички план (ДУП) на таа локација ставила маркичка за изградба на верски објект и одлучува да и' го подари на конкретна верска заедница - Македонската православна црква.

Грчев вели дека „Владата го прекршува уставниот принцип на рамноправност и еднаквост на верските заедници пред законот и Уставот и се однесува како владите од раниот комунистички систем“. Професорот тврди дека Владата во никој случај не може ова земјиште да го подари, зашто тоа не и' е законски дадено во сопственост, туку на управување, што подразбира дека таа со него мора да стопанисува на најдобар можен начин. Конкретно, ако реши да го оттуѓи, тоа мора да го направи по највисока пазарна цена, бидејќи станува збор за најстрого централно градско подрачје.

Македонската православна црква, пак, според архитектот Грчев, е исправена пред морална одговорност и „во согласност со своите христијански норми, Црквата не смее да прими незаконски подарок, а најмалку би смеела да прифати како подарок општонародно земјиште, кое насила е одвоено од народот“. На јавноста и' откри дека од пред 4-5 години Македонската православна црква го користи паркингот спроти „Холидеј ин“, кој е во нејзина сопственост.

„Црквата заедно со Јавното претпријатие за стопанисување со станбен и деловен простор, а во меѓувреме можеби и самостојно, го наплатува паркирањето. И наместо да се бори оваа огромна парцела, која и' е вратена со денационализацијата, која по сите стандарди е елитна локација, да ја претвори во планска и на неа да го изгради храмот, доколку навистина и' е толку потребен, таа најнормално стопанисува со паркингот“, посочува Грчев.

Поглаварот на Исламската верска заедница Сулејман хаџи ефенди Реџепи, пак, се' уште официјално не е информиран за последната одлука на Владата. Нејасно му е, вели, дали подареното земјиште на МПЦ некогаш било во нејзина сопственост и нагласува, во случај да не е така, дека и ИВЗ ќе бара Владата и ним да им даде атрактивна локација за изградба на Бурмали-џамијата.

Со последната одлука Владата ја упати ИВЗ на Општина Центар и од неа да бара измена на ДУП, со што би можело да се реализира иницијативата за обнова на џамијата на плоштадот. За ова, како и за барањето земјиште на кое ИВЗ ќе гради своја резиденција и библиотека, поглаварот слушнал само од медиумите.

„Се' уште ништо не можам да коментирам, бидејќи не знаеме дали станува збор за заклучок или за одлука на Владата. Сето тоа ни е нејасно“, вели Реџепи, кој и вчера залудно се обидуваше да стапи во контакт со секретарот на Владата за тој да му ги разјасни дилемите. За реис-ул-улемата малку е зачудувачки и тоа што во меѓувреме Владата комуницира со разни невладини здруженија во чија надлежност не е грижата за верските објекти.

Вчера се огласија и двете здруженија - „Прва архибригада“ и „Плоштад слобода“, кои владината одлука за отстапување на земјиштето на скопскиот плоштад на МПЦ ја оценија како обид за прикривање на неуставноста на целата постапка. Тие и натаму пред Уставниот суд ќе ја оспоруваат иницијативата за изградба на храм на таа локација, бидејќи не се противат само на градба на црква во најстрогиот центар на градот, туку на каков било друг објект.