На деканите им пукна филмот

Жаклина Ѓорѓевиќ

Деканите и министерот за образование Никола Тодоров влегоа во отворена војна, но не поради непотизмот, туку поради неговата идеја Скопскиот универзитет да се подели на пет универзитети. Скопските факултети ги тресе аферата со семејни вработувања, а деканите наместо да одговорат на овие сериозни обвинувања што дојдоа од првиот човек во ресорот образование, решија да се препукуваат со министерот околу вечно актуелната тема за позицијата на најстарата високообразовна институција. Првите луѓе на факултетите вчера во соопштение, со остри зборови го обвинија министерот за елементарно непознавање на состојбите во високото образование. Чепкањето во џебовите на професорите и нивните семејни лози на факултетите, деканите ја третираа како депласирана тема, па вчера имаа став дека сите вработувања се според законите и конкурсите.

Универзитетот „Св. Кирил и Методиј“ го понесе на сопствен грб и со сопствени средства целиот процес на имплементација на болоњските реформи без никаква финансиска помош и најмалку што може да се очекува од еден министер за образование е да изјави дека на Универзитетот се' се гледа низ призмата на средствата“, оценуваат деканите во соопштението што го лиферуваа по вчерашната затворена седница на Ректорската управа. Медиумите останаа без одговор зошто на седницата не се расправаше за непотизмот што беше посочен на шестте скопски факултети, иако претходно ректорот најави дека по седницата, ќе има и прес-конференција на која ќе ги изнесат ставовите, посебно за семејните вработувања. Забелешката на министерот дека УКИМ е обемен и законски наводно интегриран и дека ќе се најде на Шенгенската листа за 5-10 години, деканите ја отфрлија како неоправдана. Тие тврдат дека универзитетот е интегриран согласно со законот и болоњските принципи.

„Изјавата дека УКИМ треба да се подели за да биде рангиран на Шангајската листа е тотално бесмислена, обид за мешање во внатрешната организација на универзитетот, а со тоа и обид за груб упад во универзитетската автономија“, е ставот на деканите кои дообјаснуваат дека во Европа се случува процес на обединување, а не на расцепкување на универзитетите.

„Зошто на министерот му пречи силен, развиен, интегриран и афирмиран универзитет, како што е „Св. Кирил и Методиј“ во Скопје“, прашуваат првите луѓе на факултетите. Тие го предупредуваат министерот дека неговите ставови можат да бидат опасни и му сугерираат да ги преиспита ако сака да продолжат со нивната соработка. „Универзитетот со целиот свој потенцијал и сите расположливи средства ќе ја брани својата уставно загарантирана автономија“, е пораката до министерот.

„Нема потреба од гнев, говор на омраза и непочитување“, одговара писмено министерот. Тој порачува дека е отворен за сугестии, но „нема да подлегне на притисок и лична дискриминација“. Тодоров вели дека презентирал идеја со разработлив концепт за кој е отворен за сугестии, а преку кој универзитетот би можел да се пласира меѓу врвните универзитети.

„Концептот за интегриран универзитет е концепт за функционална реорганизација со што би се овозможило негово доближување до светските образовни трендови“ потенцира министерот во реакцијата до деканите.