Руска инвестиција во „Бунарџик“ дојде по стапките на Александар

Пред две години подарената книга на Груевски заврши со изградба на фабрика-барем така вели газдата Сергејевич

Маја Томиќ

На повидок е петтата по ред инвестиција во зоната „Бунарџик“. Вчера се фрлија лопатите на новата фабрика на руската „Продис“ , што е дел од фармацевтскиот холдинг „Протект Груп“ и ќе произведува природни и здрави производи. Таа треба да им стане сосед на „Џонсон Контролс“, „Џонсон Мети“, „Технохозе“ и „Кемет Електроникс“. Инвестицијата тежи пет милиони евра и ќе се одвива во две фази, а треба да обезбеди вкупно 300 нови вработувања. Производството треба да започне во јули идната година.

„’Продис’ ќе произведува хомеопатски лекови, органски и неоргански производи од житарки, како и органски и неоргански чаеви, витамини и минерали. Покрај во Руската Федерација, ќе извезува и на пазарите во поранешните советски и југословенски републики,како и во прекуокеанските држави. Инвестицијата е насочена кон заживување на стагнирачките слободни економски зони во Македонија. Целта е да се искористи квалификуваната работна сила и релативно поволните регулативи за вршење бизнис. Се надеваме дека таа ќе биде успешна“, изјави Јакунин Вадим Сергејевич, претседателот на бордот на директори на руската група на компании „Протек Груп“, на вчерашното свечено ставање на камен темелникот на „Продис“ во зоната „Бунарџик“.

Таму беа и премиерот Никола Груевски, вицепремиерите Зоран Ставрески и Владимир Пешевски и претставници на други институции. Груевски нагласи дека станува збор за прва руската инвестиција кај нас во фармацевтската индустрија, која би требало да ја следат и други инвеститори од Русија од други сектори, покрај енергетскиот и рударскиот.

„Протек“, преку нивната овдешна компанија „Продис“ , ќе ги пробива своите производи во Југоисточна Европа, Русија и прекуокеанските пазари во САД и Австралија. Со тоа американскиот „Џонсон контролс“, британскиот „Џонсон Мети“, италијанскиот „Технокозе“ и американскиот „Кемет електроник“ добиваат нов сосед“, рече Груевски, додавајќи дека „Бунарџик“ од ливада почна да прераснува во вистинска индустриска база.

Претходно во Владата се потпишани два договора за долготраен закуп на државно земјиште и за доделување државна помош, со што и официјално започна реализацијата на оваа руска инвестиција. Параф на документите ставија директорот на „Продис ДОО“ , Коста Димов и првите луѓе на Агенцијата за странски инвестиции и на ТИРЗ Скопје 1 - „Бунарџик“, Виктор Мизо и Наташа Хаџилега.

Инаку, „Протек Груп“ постои од 1990 година и е најголемиот дистрибутер на лекови и на козметика во Русија. На рускиот и на украинскиот пазар холдингот има 655 аптеки и е еден од најголемите фармацевтски холдинзи во Русија. Се занимава со производство, дистрибуција и трговија со лекови и козметика, а вработува 12.000 луѓе. Неговото мото е : „ние ги чуваме луѓето здрави и убави“.

„Протек Груп“ е основана од Јакунин Вадим Сергејевич, кој, освен што е претседател на бордот на директори, воедно е и претседател на Сојузот на професионални фармацевтски организации и советник на бордот на Руската стопанска комора. Тој на листата на „Форбс“ важи за еден од набогатите луѓе. Вчера не пропушти да каже и дека е љубител на македонската култура, како дел од словенската.

„Голем љубител сум на историјата. Пред две години дојдов да му подарам книга на премиерот Груевски за историјата на словенските народи во која има голем дел за Македонија и за Александар Македонски. Груевски ме убеди да изградам фабрика во Македонија“, изјави Сергејевич.

Така, додека сите го чекавме турски „Шишеџам“ како следна инвестиција во „Бунарџик“, за која Владимир Пешевски изјавуваше дека е повеќе од сигурно неговото доаѓање последнава пролет, во период од последниве два месеца ни пристигнаа две други компании, чии имиња Владата никогаш не ги спомена, „Кемет Електроникс“ и „Продис“. Според директорот на Агенцијата за странски инвестиции, Мизо, до крајот на месецот ќе дојде уште некој голем странски инвеститор чие име засега не се обелоденува. (M.T.)